کراچی: متحدہ قومی موومنٹ (ایم کیو ایم) پاکستان اور حکومتی وفد کے درمیان ہونے والی ملاقات کا اندرونی احوال سامنے آگیا۔
ذرائع نے اے آر وائی نیوز کو بتایا کہ ایم کیو ایم پاکستان نے حکومتی وفد کے ساتھ ملاقات میں کے فور اور کراچی حیدرآباد ترقیاتی پیکج بڑھانے کا مطالبہ رکھا۔
ذرائع نے بتایا کہ حکومتی وفد نے مطالبے پر بجٹ میں کے فور منصوبے کی مختص رقم بڑھا کر 10 ارب روپے، کراچی ترقیاتی پیکج 15 ارب سے بڑھا کر 25 ارب اور حیدراباد پیکج کی رقم 5 ارب سے بڑھا کر 10 ارب کرنے کی یقین دہانی کروائی۔
یہ بھی پڑھیں: ایم کیو ایم نے کراچی اور حیدرآباد سے متعلق خوشخبری سنا دی
اتحادی جماعت نے ملاقات میں شکوہ کیا کہ ایم کیو ایم پاکستان پی ڈی ایم وقت سے مسلم لیگ (ن) کے ساتھ ہے لیکن پھر بھی ہمیں پھنسا کر رکھا گیا ہے، کراچی سمیت شہری سندھ کو پاکستان پیپلز پارٹی کے رحم و کرم پر چھوڑ رکھا ہے۔
حکومتی وفد نے یقین دہانی کروائی کہ پی ایس ڈی پی میں وفاق کی اسکیمیں پی آئی ڈی سی ایل کے تحت مکمل کی جائیں گی، کے فور اور گرین لائن کو مقررہ وقت پر مکمل کیا جائے گا۔
اتحادی جماعت کا اپنے مطالبات کے حوالے سے پیر یا منگل کو وزیر اعظم شہباز شریف سے بھی ملاقات کا امکان ہے۔ وزیر اعظم سے ملاقات کے بعد اتحادی جماعت بجٹ منظوری میں حکومت کا ساتھ دینے یا نہ دینے کا فیصلہ کرے گی۔
واضح رہے کہ اتحادی جماعت کے وفد میں خالد مقبول صدیقی، فاروق ستار، امین الحق اور جاوید حنیف شامل تھے جبکہ حکومتی وفد میں نائب وزیر اعظم اسحاق ڈار اور احسن اقبال تھے۔
