کراچی: متحدہ قومی موومنٹ (ایم کیو ایم) پاکستان کے وفد کی وزیر اعظم شہباز شریف سے ملاقات شیڈول ہو گئی، نگراں وزیر اعلیٰ سندھ کے لیے نام بھی شارٹ لسٹ کر لیا گیا۔
تفصیلات کے مطابق ایم کیو ایم پاکستان کے وفد کی وزیر اعظم شہباز شریف سے ملاقات شیڈول ہو گئی، ذرائع کا کہنا ہے کہ ایم کیو ایم وفد کی ملاقات آج دوپہر 12 بجے وزیر اعظم ہاؤس میں ہوگی، جس میں گورنر سندھ، خالد مقبول، امین الحق، مصطفیٰ کمال، فاروق ستار شریک ہوں گے۔
ذرائع ایم کیو ایم کے مطابق اس ملاقات میں نگراں حکومت اور اسمبلیوں کی تحلیل کے حوالے سے تاریخ سمیت اہم امور پر مشاورت ہوگی، ایم کیو ایم ڈیجیٹل مردم شماری کو نوٹیفائیڈ کر کے الیکشن کرانے کا مطالبہ بھی رکھے گی، وفد نگراں وزیر اعظم کے ناموں سمیت پرانی مردم شماری پر انتخابات اور ووٹر لسٹوں پر اپنے تحفظات بھی وزیر اعظم کے سامنے رکھے گا۔
ذرائع کا کہنا ہے کہ ایم کیو ایم نے گورنر سندھ کو بھی اہم ٹاسک دے دیا ہے، بطور وفاقی نمائندے گورنر سندھ ایم کیو ایم کے تحفظات پر وزیر اعظم سے بات کریں گے، وہ نگراں وزیر اعلیٰ سندھ اور اپوزیشن لیڈر سندھ اسمبلی سے متعلق بھی اسٹیک ہولڈرز سے بات چیت کریں گے۔
دوسری طرف رات گئے ڈاکٹر خالد مقبول صدیقی کی زیر صدارت ایم کیو ایم کا اسلام آباد میں مشاورتی اجلاس منعقد ہوا، جس میں ایم کیو ایم نے نگراں وزیر اعلیٰ سندھ کے لیے نام شارٹ لسٹ کر لیا، ذرائع کا کہنا ہے کہ ایم کیو ایم کے مشاورتی اجلاس میں شعیب صدیقی کے نام پر اتفاق رائے کیا گیا ہے، آج ملاقات میں ایم کیو ایم وزیر اعظم کو نگراں وزیر اعلیٰ سندھ کے لیے شعیب صدیقی کا نام دے گی۔ کہا گیا کہ شعیب صدیقی اچھی شہرت کے حامل ہیں اور سابق کمشنر کراچی سمیت اہم عہدوں پر فائز رہ چکے ہیں۔
