لندن: برطانیہ میں بانی متحدہ کی رہائش گاہ سمیت دیگر جائیدادوں پر متحدہ قومی موومنٹ پاکستان نے دعویٰ دائر کر دیا ہے۔
اے آر وائی نیوز کے مطابق ایم کیو ایم پاکستان نے لندن ہائی کورٹ میں جائیدادوں کی ملکیت کا دعویٰ کر دیا، ذرایع کا کہنا ہے کہ ایم کیو ایم پاکستان نے بانی متحدہ، ان کے بھائی اور 5 دیگر افراد کے خلاف دعویٰ دائر کیا ہے۔
رپورٹ کے مطابق ایم کیو ایم پاکستان نے لندن کے لا فرم کے ذریعے مجموعی طور پر 7 جائیدادوں پر دعویٰ کیا ہے، ذرایع کا کہنا ہے کہ ان جائیدادوں کی ملکیت تقریباً 10 ملین پاؤنڈز ہے۔
یہ دعویٰ ایم کیو ایم پاکستان کی جانب سے ممبر قومی اسمبلی امین الحق نے کیا ہے، کیس میں طارق میر، محمد انور، افتخار حسین، قاسم رضا، یورو پراپرٹی ڈویلپمنٹ کو بھی نامزد کیا گیا ہے۔
جن پراپرٹیز کے متعلق دعویٰ دائر کیا گیا ہے ان میں بانی متحدہ کی رہائش گاہ بھی شامل ہے، وکلا نے دعویٰ کیا ہے کہ ایم کیوایم پاکستان ان پراپرٹیز کی قانونی طور پر حق دار ہے۔
وکلا کا کہنا ہے کہ برطانوی ٹرسٹ قوانین کے تحت ایم کیو ایم پاکستان جائیدادوں کی قانونی ملکیت کی حق دار ہے، ایم کیو ایم نے عدالت سے ٹرسٹ قوانین کے تحت جائیدادوں کی فروخت اور کرایہ وغیرہ کی رقم سے متعلق حکم امتناع کی استدعا کر دی ہے۔
