کراچی : متحدہ قومی موومنٹ اور پیپلزپارٹی کے درمیان پیدا ہونے والا ڈیڈ لاک تاحال برقرار ہے، سندھ حکومت کی یقین دہانی کے بعد متحدہ نے اپنا دھرنا مؤخر کردیا تھا۔
تفصیلات کے مطابق ایم کیو ایم پاکستان اور پیپلزپارٹی کے درمیان مفاہمتی عمل ایک بار پھر مشکلات کا شکار ہوگیا ہے، اس حوالے سے ذرائع کا کہنا ہے کہ سندھ حکومت کی جانب سے یونین کمیٹیز کی تعداد بڑھانے کا لیٹر جاری نہ ہوسکا۔
ذرائع کے مطابق ایم کیو ایم پاکستان نے اس حوالے سے گورنر سندھ کو اپنے تحفظات سے آگاہ کردیا ہے، اب ایم کیو ایم پاکستان نے آئندہ کے لائحہ عمل پر غور کرنا شروع کردیا۔
ذرائع کا کہنا ہے کہ گورنر سندھ نے ایم کیو ایم کے تحفظات گزشتہ دنوں وزیراعظم سے ملاقات میں بھی رکھے، گورنرسندھ پیپلزپارٹی کی مرکزی قیادت سے بھی رابطہ کریں گے۔
یاد رہے کہ صوبائی وزیر ناصر حسین شاہ نے متحدہ قومی موومنٹ کو15فروری کو24سے48گھنٹے میں لیٹر جاری کرنے کی یقین دہانی کرائی تھی۔
ایم کیو ایم پاکستان نے اس حوالے سے فوارہ چوک پر دھرنے کی کال بھی دے رکھی تھی، تاہم پی پی کی یقین دہانی کے بعد12فروری کو مؤخر دھرنے کی نئی تاریخ نہیں دی گئی تھی۔
مزید پڑھیں : ایم کیو ایم نے کاغذات نامزدگی واپس لے کیے
ذرائع کے مطابق حلقہ بندیوں میں یوسیز کی تعداد بڑھانے کے لیے تاحال نوٹیفکیشن جاری نہ کرنے پر ایم کیو ایم پیپلزپارٹی سے ناراض ہے۔ اس حوالے سے ذرائع کا کہنا ہے کہ پیپلزپارٹی نے ایم کیو ایم کو جواب دیا ہے کہ حلقہ بندیوں سے متعلق ڈرافٹ تیار کر رہے ہیں۔
