واشنگٹن: امریکا میں خاتون اینکر خود خبروں کی زینت بن گئیں، براہِ راست نشریات کے دوران ان کا بیٹا اسٹوڈیو میں گھس کر کیمرے کے سامنے آگیا۔
تفصیلات کے مطابق امریکی میڈیا ’این بی سی‘ کی خاتون اینکر ’کورٹنی کیوب‘ براہ راست نشریات کے دوران شام میں جاری حالیہ کشیدگی پر تبصرہ کررہی تھیں کہ اچانک ان کا چار سالہ بیٹا نیوز روم میں داخل ہوا اور کیمرے کے سامنے آکر اپنی والدہ کے کولر مائک کو چھونے کی کوشش کی۔
براہ راست نشریات کے دوران بعض اوقات اس قسم کے دلچسپ اور انوکھے واقعات رونما ہوتے رہتے ہیں، جس کے باعث خبررساں چینل، اینکر یا رپورٹر خود خبر بن جاتے ہیں۔
Sometimes unexpected breaking news happens while you're reporting breaking news. #MSNBCMoms #workingmoms pic.twitter.com/PGUrbtQtT6
— MSNBC (@MSNBC) October 9, 2019
ایسی ہی صورت حال کا سامنا امریکی دارالحکومت واشنگٹن میں قائم این بی سی کے نیوز روم میں خاتون اینکر کو کرنا پڑا، جس کے بعد یہ ویڈیو سوشل میڈیا پر وائرل ہوگئی اور اب تک اسے 20 لاکھ افراد دیکھ چکے ہیں۔
کورٹنی کیوب کا کہنا تھا کہ میں نے جب اپنے بیٹے کو اس طرح کیمرے کے سامنے دیکھا تو میں دنگ رہ گئی، اور ایک لمحے کے لیے مجھے محسوس ہوا کہ میرے دل کی دھڑکنیں رک گئی ہیں۔
ٹی وی کی براہ راست نشریات کے دوران تجزیہ کار سو گئے
انہوں نے مزید کہا کہ مجھے اس بات کی خوشی ہے کہ اسٹوڈیو میں میرے بیٹے نے شور نہیں مچایا نہ ہی رویا، بصورت دیگر لائیو نشریات متاثر ہوسکتی تھی۔
واضح رہے کہ رواں سال مارچ میں امریکی ٹی وی چینل کے رپورٹر کی براہ راست نشریات کے دوران تھوک لگا کر بال سیٹ کرنے کی ویڈیو وائرل ہوئی تھی۔
