اسلام آباد: وزیر خزانہ محمد اورنگزیب کا کہنا ہے کہ وزیر اعظم شہباز شریف کی قیادت میں بجلی کی قیمتوں میں کمی کے اقدامات کیے جا رہے ہیں اور اس حوالے سے ان کی جانب سے اعلان جلد متوقع ہے، اس اقدام سے مینوفیکچرنگ سیکٹر کو فروغ ملے گا اور برآمدات میں اضافہ ہوگا۔
چین کے باؤ فورم کے دوران عالمی اشاعتی و نشریاتی جریدے بلوم برگ کو دیے گئے انٹرویو میں وزیر خزانہ محمد اورنگزیب نے کہا کہ حکومت کی توجہ معیشت کو بہتر بنانے پر مرکوز ہے، حکومت ملکی برآمدات بڑھانے کی حکمت عملی پر عمل پیرا ہے۔
یہ بھی پڑھیں: ‘وزیر اعظم جلد بجلی کی قیمت میں کمی کی خوشخبری سنائیں گے’
محمد اورنگزیب نے کہا کہ آنے والے وفاقی بجٹ میں ٹیکس دائرہ وسیع کرنے پر توجہ دی جائے گی، ریئل اسٹیٹ، ریٹیل اور زراعت جیسے شعبوں کو ٹیکس نظام میں شامل کیا جائے گا، ٹیکس بنیاد کو وسعت دے کر مینوفیکچرنگ سیکٹر پر غیر ضروری ٹیکسز کا بوجھ کم کرنا ہے جو اب تک ٹیکس کا بڑا حصہ ادا کر رہا ہے۔
وزیر خزانہ نے مہنگائی کے رجحانات پر اطمینان کا اظہار کرتے ہوئے کہا کہ مجموعی اور بنیادی مہنگائی کی سطح پر گہری نظر رکھی جا رہی ہے، اس سال کے دوران شرح سود میں مزید کمی متوقع ہے جس سے اقتصادی ترقی کیلیے حالات مزید بہتر ہوں گے۔
انٹرویو میں انہوں نے یہ بھی بتایا کہ پاکستان اس کیلنڈر سال میں پہلا چینی یوان بانڈ جاری کرنے کا ارادہ رکھتا ہے جس کی مالیت 200 سے 250 ملین ڈالر کے درمیان ہوگی، بانڈ کا حجم اہم نہیں بلکہ فنڈنگ ذرائع میں تنوع مقصود ہے، فنڈ کا استعمال موسمیاتی تبدیلی سے متعلق منصوبوں کیلیے کیا جائے گا، یہ موزوں وقت ہے پاکستان دنیا کی دوسری سب سے بڑی اور گہری کیپٹل مارکیٹ سے فائدہ اٹھائے۔
