اسلام آباد : وزیر خزانہ محمد اورنگزیب کا کہنا ہے کہ پاکستان میں تنخواہ دار طبقے کی مشکلات سے آگاہ ہیں، طبقے پر ٹیکسوں کا مزید بوجھ نہیں ڈال سکتے ہیں۔
تفصیلات کے مطابق وزیر خزانہ محمداورنگزیب نے فرانسیسی نیوز ایجنسی کو انٹرویو دیتے ہوئے کہا کہ پاکستان میں تنخواہ دارطبقےکی مشکلات سےآگاہ ہیں، تنخواہ دار طبقے پرٹیکسوں کامزید بوجھ نہیں ڈال سکتے ہیں۔
وزیر خزانہ نے بتایا کہ صنعتی شعبہ بھی ٹیکس کی زیادہ سے زیادہ حد کو پہنچ چکا ہے، ٹیکس آمدن سےٹیکس کی وصولی بہتر کرنا ہوگی، ریئل اسٹیٹ اور ریٹیلزسیکٹرز سے ٹیکس آمدن بڑھانا ہوگی۔
ان کا کہنا تھا کہ ملک میں 52 لاکھ سے زائد انکم ٹیکس گوشوارے جمع ہوئے ہیں اور ٹیکس بیس میں 29 فیصد اضافہ کیا گیا ہے۔
وفاقی وزیر نے روز دیا کہ سرکاری کارپوریشنز میں چوری روکنا ہوگی، بجلی کےنقصانات قابوکریں گے، ٹیکس چوری کسی صورت برداشت نہیں کرسکتے۔
قومی ایئرلائن کی نجکاری کے حوالے سے انھوں نے بتایا کہ پی آئی اے کی نج کاری نومبرمیں کردی جائے گی، پی آئی اے کی بولی میں حصہ لینے والوں کوجانچ پڑتال کا موقع دیا۔
وزیر خزانہ نے مزید کہا حکومت پاکستان جون2024میں پی آئی اےکی نج کاری کرنا چاہتی تھی لیکن پی آئی اے کی اثاثہ جات کی جانچ پڑتال کی وجہ سے نجکاری کے عمل میں تاخیر ہوئی۔
ملکی قرضوں سے متعلق ان کا کہنا تھا کہ پاکستان پر مجموعی قرضے 258 ارب ڈالر تک پہنچ چکےہیں، معیشت میں قرضوں کا حصہ 69 فیصد تک پہنچ چکا ہے۔
