قومی وکٹ کیپر بلے باز محمد رضوان نے سوئیڈن میں قرآن پاک کی بے حرمتی کے واقعے پر کہا ہے کہ ہر مسلمان قرآن کو اپنے دل میں محفوظ رکھتا ہے۔
اے آر وائی نیوز کے مطابق پاکستان کرکٹ ٹیم کے وکٹ کیپر بیٹر محمد رضوان نے سوئیڈن میں قرآن پاک کی بے حرمتی کے واقعے پر ردعمل دیتے ہوئے سماجی رابطوں کی ویب سائٹ ٹوئٹر پر اظہار خیال کیا ہے۔
محمد رضوان نے اپنے ٹویٹ میں کہا ہے کہ ہر مسلمان نے قرآن پاک کی آیات کو اپنے دل میں محفوظ کر رکھا ہے اور اس قدر محفوظ چیز کو نقصان پہنچانا صرف اس وقت ہی ممکن ہو سکتا ہے جب اس کا محافظ اسے دل سے نکال دے۔
محمد رضوان نے لکھا ہے کہ قرآن پاک کی بے حرمتی تو دور کی بات کوئی ایسا سوچ بھی نہیں سکتا۔ ہم تمام مذاہب کا احترام کرتے ہیں، ان مذاہب کے ماننے والوں کے جذبات اپنے مذہب سے جڑے ہوتے ہیں اور ہم بھی دوسروں سے اسی کی درخواست کرتے ہیں۔
Quran is a word of guidance for the whole Humanity from Allah Subhanahu wa Ta'ala and every Muslim has preserved the Ayahs in their hearts.
And henceforth, damaging of much protected word seems possible only after the termination of its protectors. Let alone the desecration of… pic.twitter.com/pFaXie8y3e— Muhammad Rizwan (@iMRizwanPak) July 8, 2023
واضح رہے کہ سوئیڈن میں عیدالاضحیٰ کے روز ایک گستاخ شخص نے مسجد کے سامنے پولیس کی نگرانی میں قرآن پاک کی بے حرمتی کی تھی جس کے بعد دنیا بھر کے مسلمانوں کا احتجاج جاری ہے جب کہ غیر مسلم ممالک کی جانب سے بھی اس ناپاک حرکت کی مذمت کی جا رہی ہے۔
دنیا بھر میں شدید احتجاج کے بعد سوئیڈن نے بھی قرآن پاک کی بے حرمتی کو غیر قانونی قرار دینے پر غور شروع کر دیا ہے اور سوئیڈن کے وزیر انصاف کا کہنا ہے کہ حالیہ واقعات سے سوئیڈن کی داخلی سلامتی کے خطرات میں اضافہ ہوا ہے۔
سویڈن کے وزیر انصاف گونار اسٹرومر نے کہا کہ حکومت قرآن پاک کی بے حرمتی کے واقعے کے بعد پیدا ہونے والی صورتحال کا جائزہ لی رہی ہے اور قرآن پاک سمیت دیگر مقدس کتب کی بے حرمتی کو غیر قانونی قرار دینے پر غور کیا جا رہا ہے۔
