اسلام آباد: چیئرمین پاکستان تحریک انصاف (پی ٹی آئی) بیرسٹر گوہر کا سابق گورنر سندھ محمد زبیر کے پارٹی میں شامل ہونے کی خبروں پر بیان سامنے آگیا۔
اسلام آباد ہائیکورٹ میں میڈیا سے گفتگو کرتے ہوئے بیرسٹر گوہر نے کہا کہ بانی پی ٹی آئی عمران خان کی سزاؤں کی معطلی کے حوالے سے 190 ملین پاؤنڈ کیس سماعت کیلیے مقرر ہوا، پہلی مرتبہ پراسیکیوشن ٹیم کی جانب سے کوئی پیش ہوگا لہٰذا امید ہے کوئی مثبت پیشرفت ہوگی۔
یہ بھی پڑھیں: ’عارف علوی نے پیغام دیا محمد زبیر پی ٹی آئی جوائن کرنا چاہتے ہیں‘
بیرسٹر گوہر نے کہا کہ کیس کی سماعت نہیں ہوئی تھی روٹین میں ایک مہینے کے اندر فیصلہ ہوتا ہے، سابق وزیر اعظم نواز شریف کے کیس میں 70 دن بعد ان کی رہائی ہوگئی تھی جبکہ دوسرے کیس میں 51 دن کے بعد ان کی رہائی ہوئی تھی لیکن عمران خان کے کیسز کو 3 اگست کو 2 سال ہو جائیں گے۔
اس دوران صحافی نے سوال کیا کہ کیا محمد زبیر پی ٹی آئی میں شامل ہو رہے ہیں؟ بیرسٹر گوہر نے جواب دیا کہ پی ٹی آئی سیاسی جماعت ہے لہٰذا ہمارے دروازے سب کیلیے کھلے ہیں۔
ذرائع نے اے آر وائی نیوز کو بتایا ہے کہ مسلم لیگ (ن) سے راہیں جدا کرنے والے سابق گورنر سندھ محمد زبیر کی پی ٹی آئی میں جلد شمولیت متوقع ہے۔
ذرائع نے بتایا کہ محمد زبیر کی پی ٹی آئی میں شمولیت سے متعلق مشاورت کر لی گئی ہے اور انہیں پارٹی میں شامل کرنے کیلیے عمران خان نے گرین سگنل دے دیا ہے۔
اس سے قبل اے آر وائی نیوز کے پروگرام ’آف دی ریکارڈ‘ میں رہنما پی ٹی آئی رؤف حسن نے دعویٰ کیا تھا کہ عارف علوی نے پیغام دیا کہ محمد زبیر پارٹی میں آنے کیلیے دلچسپی رکھتے ہیں۔
