اسلام آباد: محرم الحرام میں ہیٹ ویو کے پیش نظر بجلی کی بلاتعطل فراہمی کے سلسلے میں وزیر توانائی اویس لغاری نے ڈسکوز کے چیئرمین/ سی ای اوز کو ایک خط لکھا ہے۔
تفصیلات کے مطابق وفاقی وزیر توانائی اویس لغاری نے ڈسکوز کو لکھے گئے خط میں محرم الحرام کے تناظر میں فوری اقدامات کرنے، اور مجالس اور جلوسوں کے مقامات پر پیشگی مرمت کے احکامات جاری کیے ہیں۔
اویس لغاری نے کہا محرم الحرام کا مقدس مہینہ قریب آ رہا ہے، جس میں ملک بھر میں لاکھوں عزاداران مجالس اور جلوسوں میں شرکت کریں گے، تاہم رواں سال محرم میں ہیٹ ویو کے امکانات ہیں اس لیے بلا تعطل بجلی کی فراہمی کو یقینی بنانے کی اشد ضرورت ہے۔
وفاقی وزیر نے ہدایت کی کہ مذہبی تقریبات کے دوران عوام کو ہر قسم کی تکلیف سے بچایا جائے، تمام ڈسکوز میں خراب سامان کی فوری مرمت یا تبدیلی کو یقینی بنایا جائے، اویس لغاری نے ڈسکوز کو ایمرجنسی رسپانس ٹیمیں تشکیل دینے کے بھی احکامات دیے، اور کہا یوم عاشور پر ایمرجنسی رسپانس ٹیموں کو ہائی الرٹ پر تعینات کیا جائے اور مقامی حکام کے ساتھ مسلسل رابطہ رکھا جائے۔
کراچی میں تیز ہوائیں چلنے کا امکان، موسمیات کی پیشگوئی
انھوں نے ہدایت کی کہ ضلعی انتظامیہ، قانون نافذ کرنے والے اداروں اور مذہبی تنظیموں کے ساتھ مکمل تعاون کریں، صارفین، خصوصاً امام بارگاہوں اور مساجد کو کسی بھی شیڈولڈ مرمت یا ممکنہ لوڈ مینجمنٹ کے بارے میں پیشگی آگاہ کریں، حساس مقامات پر اسٹینڈ بائی جنریٹرز اور یو پی ایس سسٹمز کی دستیابی کو یقینی بنایا جائے۔
اویس لغاری کا کہنا تھا کہ کسی بھی غیر متوقع گرڈ مسئلے کی صورت میں بیک اپ بجلی فراہم کی جائے، محرم کے دوران تکنیکی اور آپریشنل عملے کی 24/7 دستیابی کو یقینی بنایا جائے، تمام سطحوں پر مخصوص کنٹرول سینٹرز قائم کیے جائیں، اور اس معاملے میں کسی بھی قسم کی غفلت یا کوتاہی کی گنجائش نہیں ہے۔
