ملتان : پنجاب میں چھوٹے بچوں سے جبری مشقت اور ان پر مظالم کی خبریں عام ہوتی جارہی ہیں، اسی نوعیت کا دلخراش واقعہ ملتان میں بھی پیش آیا ہے۔
ملتان کے علاقے چار فیض میں 5سالہ طالب علم پر پہیمانہ تشدد کا واقعہ پیش آیا جس نے دیکھنے والوں کے دل دہلا دیئے۔
اس حوالے سے پولیس کا کہنا ہے کہ قدیر نامی حلوائی نے بچے کو برتن دھونے کیلئے بلایا اور پیسے دینے کا وعدہ کیا تھا۔
بعد ازاں لین دین کے معاملے پر حلوائی نے بچے پر تشدد کیا اور اس کے ہاتھ ابلتے ہوئے تیل میں ڈال دیئے تھے جس سے اس کی حالت تشویشناک ہوگئی۔
بچے کے دونوں ہاتھ جھلس گئے، بچہ مقامی اسپتال کے برن یونٹ میں زیرعلاج ہے، تھانہ بستی ملوک پولیس نے ملزم قدیر کو گرفتار کرلیا، واقعے کی مزید تفتیش کی جارہی ہے۔
