قومی اسپنرز کی جادوئی بولنگ کی بدولت پاکستان نے انگلینڈ کو ملتان میں کھیلے گئے دوسرے ٹیسٹ میچ میں 152 رنز سے شکست دے دی۔
پاکستان کرکٹ ٹیم نے انگلینڈ کو ملتان میں کھیلے جا رہے دوسرے ٹیسٹ میچ میں 152 رنز سے شکست دے کر تین ٹیسٹ میچوں کی سیریز ایک، ایک سے برابر کر دی۔ یہ قومی ٹیم کی ہوم گراؤنڈ پر ٹیسٹ میچ میں ساڑھے تین سال بعد پہلی فتح ہے۔
پاکستانی اسپنرز کی جوڑی ساجد خان اور نعمان علی کی گھومتی ہوئی بالز کا انگلینڈ کے بلے باز مقابلہ نہ کر سکے اور پہلے سیشن میں 8 وکٹیں گنوا دیں۔
میچ کے چوتھے روز انگلینڈ نے جیت کے لیے ملنے والے 297 رنز کے ہدف کے تعاقب میں دو وکٹوں پر 36 رنز کے ساتھ دوسری ادھوری اننگ کا آغاز کیا اور پوری ٹیم صرف 144 رنز پر ڈھیر ہوگئی۔ ساجد خان کو میچ کا بہترین کھلاڑی قرار دیا گیا۔
View this post on Instagram
انگلش ٹیم جس نے پاکستان کی جانب سے ٹیسٹ میچ جیتنے کے لیے ملنے والے 297 رنز کے تیسرے روز کھیل کے اختتام تک 11 رنز پر دو وکٹیں گنوا دی تھیں۔ آج چوتھے روز جب انگلش ٹیم نے دوسری نامکمل اننگ کا آغاز دو وکٹوں پر 36 رنز کے ساتھ کیا تو پہلے ہی اوور میں ساجد خان نے اولی پوپ کو 22 کے انفرادی اسکور پر اپنی ہی گیند پر کیچ لے کر آؤٹ کردیا۔
نعمان علی نے پہلے ٹیسٹ میچ کے ہیرو ہیری بروک اور جو روٹ کو ایل بی ڈبلیو آؤٹ کر کے انگلینڈ کی بیٹنگ لائن کی کمر توڑ دی ہے۔ اس کے بعد تو نعمان علی جیسے چھا گئے اور انہوں نے کسی کو انگلش بیٹر کو زیادہ دیر وکٹ پر ٹکنے نہ دیا۔ کپتان بین اسٹوکس (37)، بریڈن کرس (27)، جیمی اسمتھ (6)، جیک لیچ اور شعیب بشیر کو ٹھکانے لگایا۔
View this post on Instagram
دوسری اننگ کے ہیرو نعمان علی رہے جنہوں نے صرف 46 رنز دے کر 8 وکٹیں حاصل کیں جب کہ ساجد خان کے ہاتھ دو وکٹیں آئیں۔ میچ میں نعمان علی نے 11 جب کہ ساجد خان نے 9 وکٹیں حاصل کیں۔
View this post on Instagram
پورے ٹیسٹ میچ کا مختصر جائزہ لیں تو پاکستان کے کپتان شان مسعود نے ٹاس جیت کر پہلے بیٹنگ کا فیصلہ کیا تھا اور پہلی اننگ میں 366 رنز بنا کر آؤٹ ہوگئی تھی۔ اس اننگ کی خاص بات ڈیبیو کرنے والے کامران غلام کی سنچری تھی جنہوں نے 118 رنز کی شاندار اننگ کھیلی تھی۔
View this post on Instagram
جواب میں انگلینڈ کی ٹیم پاکستانی اسپنرز کا مقابلہ نہ کر سکی اور پوری ٹیم 291 رنز پر پویلین لوٹ گئی۔ ساجد خان نے 7 اور نعمان علی نے 3 وکٹیں حاصل کیں۔
گزشتہ روز پاکستان ٹیم پہلی اننگ میں 75 رنز کی برتری پانے کے بعد دوسری اننگ میں 221 رنز بنا کر آؤٹ ہو گئی تھی۔ سلمان علی آغا 63 اور سعود شکیل 31 رنز کے ساتھ نمایاں رہے تھے۔ پاکستان نے انگلینڈ کو جیت کے لیے 297 رنز کا مشکل ہدف دیا تھا۔
View this post on Instagram
واضح رہے کہ انگلینڈ اور پاکستان کے مابین تین ٹیسٹ میچوں کی سیریز آئی سی سی ورلڈ ٹیسٹ چیمپئن شپ کا حصہ ہے۔ پہلا ٹیسٹ میچ انگلینڈ نے اننگ اور 47 رنز سے اپنے نام کیا اور دوسرے ٹیسٹ میچ پاکستان نے جیت کر سیریز ایک، ایک سے برابر کر دی ہے۔
