انگلینڈ کے خلاف ملتان میں کھیلے جا رہے دوسرے ٹیسٹ میچ کے دوسرے دن پاکستان کی ٹیم پہلی اننگ میں 366 رنز بنا کر آؤٹ ہوگئی۔
انگلینڈ اور پاکستان کے درمیان تین ٹیسٹ میچوں کی سیریز کا دوسرا میچ ملتان کرکٹ اسٹیڈیم میں کھیلا جا رہا ہے۔ آج دوسرے روز میزبان ٹیم نے اپنی پہلی نا مکمل اننگ کا آغاز 5 وکٹوں پر 259 رنز سے کیا تھا اور دوسرے سیشن کے آغاز میں ہی ٹیم کے مجموعے میں صرف 107 رنز کا اضافہ کر کے آؤٹ ہوگئی۔
آج پاکستان کی جانب سے گرنے والی پہلی وکٹ محمد رضوان کی تھی جو اپنے گزشتہ روز کے انفرادی اسکور میں صرف 4 رنز کا اضافہ کر کے 41 رنز پر بریڈن کرس کی دوسری وکٹ بن گئے۔ سلمان علی آغا 31 رنز بنانے کے بعد میتھیو پوٹس کی گیند پر اسمتھ کے ہاتھوں کیچ آؤٹ ہو گئے۔ ساجد خان صرف دو رنز کے مہمان ثابت ہوئے۔
View this post on Instagram
کھانے کے وقفے کے عامر جمال 37 رنز بنا کر آؤٹ ہوگئے۔ انہوں نے نعمان علی کے ساتھ مل کر نویں وکٹ کے لیے 50 رنز کی پارٹنر شپ قائم کی۔ نعمان علی 32 رنز کے انفرادی اسکور پر جیک لیک کی چوتھی وکٹ بنے۔
View this post on Instagram
انگلینڈ کی جانب سے جیک لیک نے چار، بریڈن کرس تین اور میتھیو پوٹس نے دو وکٹیں حاصل کی ہیں۔
اس سے قبل گزشتہ روز پاکستانی کپتان شان مسعود نے ٹاس جیت کر پہلے بیٹنگ کا فیصلہ کیا۔ 19 رنز پر دو وکٹیں گرنے کے بعد بابر اعظم کی جگہ ٹیسٹ ڈیبیو کرنے والے کامران غلام نے مشکل وقت میں کریز سنبھالی اور پہلے ہی میچ میں سنچری اسکور کی۔
وہ پہلے دن کے کھیل کے اختتام سے کچھ دیر قبل ہی 118 رنز کی شاندار اننگ کھیل کر آؤٹ ہوئے تھے جب کہ اوپنر صائم ایوب نے 77 رنز بنائے تھے۔
دوسرے ٹیسٹ میچ کے لیے پاکستان کرکٹ ٹیم میں چار جب کہ انگلینڈ نے دو تبدیلیاں کی ہیں۔
پاکستان نے بابر اعظم، شاہین شاہ آفریدی، نسیم شاہ کو آرام دے کر ان کی جگہ کامران غلام، ساجد خان اور نعمان علی کو شامل کیا گیا ہے جب کہ اسپنر ابرار احمد جو بیماری کے باعث ٹیسٹ نہیں کھیل رہے ان کی جگہ زاہد محمود نے پُر کی ہے۔
انگلینڈ کے ریگولر کپتان بین اسٹوکس کی انجری کے بعد ٹیم میں واپسی ہوگئی ہے۔ دوسرے ٹیسٹ میچ کے لیے فاسٹ بولرز گس اٹکنسن اور کرس ووکس کو آرام دیا گیا ہے۔ فاسٹ بولر میٹ پوٹس کو شامل کیا گیا ہے۔
دوسرے ٹیسٹ میچ کے لیے دونوں ٹیمیں ان کھلاڑیوں پر مشتمل ہیں۔
ٹیم پاکستان:
شان مسعود (کپتان)، سعود شکیل (نائب کپتان)، صائم ایوب، عبداللہ شفیق، کامران غلام، محمد رضوان، سلمان علی آغا، عامر جمال، ساجد خان، نعمان علی، زاہد محمود۔
ٹیم انگلینڈ:
بین اسٹوکس (کپتان)، زیک کرولی، بین ڈکٹ، اولی پوپ، جو روٹ، ہیری بروک، جیمی اسمتھ، برائیڈن کارس، جیک لیچ، شعیب بشیر اور میٹ پوٹس۔
واضح رہے کہ ملتان میں کھیلے گئے پہلے میچ میں انگلینڈ نے پاکستان کو اننگ اور 47 رنز کی عبرت ناک شکست دے کر تین ٹیسٹ میچوں کی سیریز میں ایک صفر کی برتری حاصل کر لی تھی۔
مذکورہ سیریز آئی سی سی ورلڈ ٹیسٹ چیمپئن شپ کا حصہ ہے اور پاکستان مسلسل شکستوں کے بعد پوائنٹ ٹیبل پر سب سے آخری نویں نمبر پر پہنچ چکا ہے جس کے بعد اس کے فائنل کھیلنے کا خواب چکنا چور ہوچکا ہے۔
