بھارت کے گنجان آباد شہر ممبئی میں تیز آندھی نے تباہی مچادی، 100 فٹ لمبا بل بورڈ گرنے سے درجنوں افراد اس کی لپیٹ میں آگئے۔
میڈیا رپوٹس کے مطابق گزشتہ دن شہر میں تیز آندھی کے ساتھ ساتھ بارش بھی ہوئی۔ ممبئی کے گھاٹ کوپر کے علاقے میں ایک 100 فٹ طویل بل بورڈ آندھی کے باعث نیچے گر گیا۔ بی ایم سی کا کہنا ہے کہ اس حادثے میں تقریباً 35 افراد زخمی ہو گئے ہیں۔
طوفان کی شدت اتنی زیادہ تھی کہ اچانک موسم بدلنے سے کئی جگہ سڑکوں پر ٹریفک رک گیا۔ لوگوں نے آندھی سے بچنے کے لیے الگ الگ مقامات پر پناہ لی۔
ممبئی ایئرپورٹ پر بھی فلائٹ آپریشن متاثر ہوا اور کچھ دیر کے لیے طیاروں کی آمد و رفت روکنی پڑ گئی۔ اتھارٹی نے بتایا کہ طوفان کے سبب 15 پروازوں میں کے اوقات کار میں تبدیلی کی گئی جبکہ شام 5.03 بجے فلائٹ آپریشن دوبارہ شروع ہوا۔
شہر میں چلنے والے دھول کے جھکڑوں کے ساتھ آندھی کی وجہ سے لوگوں کو کافی پریشانی کا سامنا کرنا پڑا جبکہ اس دوران آسمان پر ہر طرف اندھیرا چھا گیا جس کے کچھ دیر بعد تیز بارش ہونے لگی۔
ممبئی کے علاقوں گھاٹ کوپر، باندرا، کرلا اور دھاراوی میں بارش کے ساتھ تیز ہوائیں چلنے کے سبب کافی دیر تک ٹریفک بھی جام رہا۔
محکمہ موسمیات نے ممبئی، ٹھانے اور پالگھر میں تیز بارش کے ساتھ بجلی گرنے اور طوفان کا اندیشہ بھی ظاہر کیا ہے۔ اس دوران 50 سے 60 کلومیٹر فی گھنٹہ کی رفتار سے تیز اور دھول بھری آندھی چل سکتی ہے۔
