اردو ادب میں ممتاز مفتی کی پہچان ان کی افسانہ اور ناول نگاری، خاکہ نویسی، سفر نامے اور انشائیے ہیں اور موضوعات کی سطح پر نئے امکانات اور اپنے تخیّل کی بلند پروازی سے اردو ادب کی مختلف اصناف کو ایک نئی معنویت سے آشنا کرنا ممتاز مفتی کا امتیازی وصف ہے۔ آج اردو کے اس ادیب کی برسی ہے۔
ممتاز مفتی نے افسانوی اور غیر افسانوی نثر سے زبان و ادب کو مالا مال کیا اور ان کی تصانیف اردو ادب کا بیش قیمت سرمایہ ہیں۔ ممتاز مفتی کے موضوعات کا کینوس بہت وسیع ہے لیکن جنس، عورت اور انسانی نفسیات کو ان کے یہاں مرکزی حیثیت حاصل ہے۔ انسانی نفسیات کے مطالعے سے ممتاز مفتی کو ہمیشہ گہرا شغف رہا۔ ممتاز مفتی نے اپنی تحریروں میں انسانی نفسیات کے مختلف پہلوؤں کو نہایت خوب صورتی اور بے تکلفی سے اجاگر کیا جس کی مثال نثر کے میدان میں بہت کم ملتی ہے۔ ممتاز مفتی ایسے ادیب تھے جس نے سیاسی، سماجی، تہذیبی، مذہبی اور قومی مسائل پر بھی قلم اٹھایا اور اسے خوبی سے نبھایا ہے۔ ناقدین کا کہنا ہے کہ ممتاز مفتی نے موضوع، مواد اور تکنیک کے اعتبار سے کئی تجربے کیے جو ان کو دوسرے نثر نگاروں سے جدا کرتے ہیں۔ ان کے افسانوں کا جائزہ لیا جائے تو یہ بات واضح ہوگی کہ ان کا موضوع گمبھیر نفسیاتی مسائل اور عام زندگی کی مشکلات ہیں۔
ممتاز مفتی کا اصل نام ممتاز حسین تھا۔ وہ 11 ستمبر 1905ء کو بٹالہ، ضلع گورداس پور میں پیدا ہوئے۔ لاہور سے تعلیم حاصل کرنے کے بعد درس و تدریس کا پیشہ اختیار کیا۔ انھوں نے متعدد سرکاری عہدوں پر خدمات انجام دیں۔
ممتاز مفتی کا پہلا افسانہ 1936ء میں شائع ہوا تھا۔’’علی پور کا ایلی‘‘، ’’الکھ نگری‘‘ ان کے وہ ناول تھے جو قارئین میں بہت مقبول ہوئے جب کہ ان کا سفر نامہ ’’لبیک‘‘ اور ’’ہند یاترا‘‘ بھی قارئین نے بہت پسند کیے۔ شخصی خاکوں اور تذکروں کی بات کی جائے تو ممتاز مفتی کی تصانیف پیاز کے چھلکے، اوکھے لوگ، اور اوکھے لوگ لائقِ مطالعہ ہیں۔ ممتاز مفتی کے افسانے ان کہی، گہما گہمی، چپ، روغنی پتلے اور سمے کا بندھن کے نام سے کتابی شکل میں منظرِ عام پر آئے جب کہ ’غبارے ‘ کے نام سے انشائیوں بھی شایع ہوا۔
27 اکتوبر 1995ء میں ممتاز مفتی اس دارِ فانی کو خیرباد کہہ گئے تھے۔ وہ اسلام آباد کے ایک قبرستان میں آسودۂ خاک ہیں۔ انھیں حکومتِ پاکستان نے ستارۂ امتیاز سے نوازا تھا۔
