پاکستانی شوبز انڈسٹری کے اداکار منیب بٹ نے بالی وڈ کی صفِ اوّل کی اداکاراؤں عالیہ بھٹ اور دپیکا پڈوکون کے ساتھ فلم آفر ہونے کی حقیقت بیان کر دی۔
منیب بٹ حال ہی میں نجی نیوز چینل کے مزاحیہ شو کے مہمان بنے جہاں انہوں نے اپنی خاتون مداح کے اس سوال کا جواب دیا کہ آیا ان کو عالیہ بھٹ کے ساتھ بالی وڈ فلم میں کام کی آفر ہوئی تھی؟
خاتون کے سوال پر پاکستانی اداکار حیران ہوتے نظر آئے۔ انہوں نے جواب دیا کہ نہیں ایسا کچھ نہیں ہے، مجھے عالیہ بھٹ یا دپیکا پڈوکون کے ساتھ کسی فلم کی پیشکش نہیں ہوئی ہے۔
یہ بھی پڑھیں: منیب بٹ نے جوائنٹ فیملی سسٹم کے فوائد بتا دیے
انہوں نے بتایا کہ مجھے ایک انڈین پنجابی فلم کی پیشکش ہوئی تھی جس میں پاکستانی اور انڈین فنکاروں کو کاسٹ کرنا تھا لیکن یہ فلم پروڈکشن کے مرحلے میں نہیں جا سکی۔
منیب بٹ نے انڈین پنجابی فلموں کی اداکارہ سونم باجوہ کی تعریف کرتے ہوئے کہا کہ وہ واقعی خوبصورت ہیں اور ان کی خوبصورتی کی تعریف ہونی چاہیے۔
انہوں نے کہا کہ میری اہلیہ پڑھی لکھی ہیں لہٰذا وہ کسی اداکارہ کی تعریف کرنے پر اعتراض نہیں کرتیں۔
گزشتہ سال مارچ میں منیب بٹ نے اے آر وائی ڈیجیٹل کے پروگرام ’شان سحور‘ میں شرکت کے دوران کیریئر کے ابتدائی ایام اور جدوجہد کے بارے میں ناظرین کو دلچسپ قصے سنائے تھے۔
اداکار نے بتایا تھا کہ میں نے اداکار بننے کیلیے جان توڑ کوششیں کیں میرے پورے خاندان میں کوئی بھی اس فیلڈ میں نہیں لیکن میں نے باقاعدہ ایکٹنگ کی کلاسز لے کر اس شعبے میں قدم رکھا۔
’ایک بار اے آر وائی کے ڈرامے ’محمود آباد کی ملکائیں‘ کے نام سے ڈرامے کے آڈیشن ہورہے تھے اور وہاں 40 سے 50 لوگوں کے ساتھ لائن میں لگ کر میں بھی آڈیشن دیا تھا اور اس طرح کے کئی پروڈکشنز ہاؤسز میں جا جا کر کوششیں کیں۔‘
ان کا کہنا تھا کہ میں نے میڈیا اسٹڈیز میں بی ایس کی ڈگری حاصل کی ہوئی ہے اور سال 2012میں اے آر وائی ڈیجیٹل کے ڈرامے سے اپنے کیریئر کا آغاز کیا۔
منیب بٹ نے بتایا تھا کہ کئی سال تک بہت سارے مشہور برانڈز کے لیے کمرشل ماڈل کی حیثیت سے کام کرنے کے بعد پہلی بار 2012 میں اے آر وائی ڈیجیٹل کے ڈرامہ سیریل باندی سے اداکاری کا آغاز کیا تھا۔
