کراچی: پاکستانی ڈرامہ انڈسٹری کے معروف اداکار منیب بٹ نے اپنی خوشگوار ازدواجی زندگی کا راز بتادیا۔
تفصیلات کے مطابق اے آر وائی ڈیجیٹل کے مقبول ڈرامے ’کیسا ہے نصیباں‘ میں اداکاری کے جوہر دکھانے والے معروف پاکستانی اداکار منیب بٹ نے ٹی وی انٹرویو میں اپنی خوشگوار ازدواجی زندگی سے پردہ اٹھادیا۔
منیب بٹ نے اپنے ٹی وی کیریئر کا آغاز 2012 میں کیا اور متعدد کامیاب ڈراموں میں اداکاری کے جوہر دکھائے اور بہت کم وقت میں ٹیلی وژن کے مقبول اداکار کے طور پر ابھرے۔
اداکار منیب بٹ 30 اگست 2019 کو ساتھی اداکارہ ایمن خان سے رشتہ ازدواج میں منسلک ہوئے، ان کی طویل ترین شادی پر سوشل میڈیا پر تنقید کا نشانہ بھی بنایا گیا۔
انہوں نے کہا کہ شادی کے بعد ماں اور بیوی کے درمیان توازن برقرار رکھنا چاہئے، بیٹے کی شادی سے پہلے ماں پورے گھر کو سنبھالے ہوئے ہوتی ہے اور شادی کے بعد اچانک بہو کے آجانے کے بعد بیٹے کی دوری کی وجہ سے رشتوں میں دراڑ پیدا ہوتی ہے۔
منیب بٹ نے کہا کہ مثال کے طور پر جب میں اپنے گھر واپس آتا تھا تو پہلے اپنی والدہ کو سلام کرتا تھا اب اگر میں پہلے اپنی بیوی کو سلام کرتا ہوں اور اپنی والدہ کو نظرانداز کرتا ہوں تو یہ ایک والدہ کے لیے پریشانی کا سبب بنتا ہے۔
انہوں نے کہا کہ میری ذمہ داری ہے کہ والدہ اور بیوی دونوں کی ذمہ داریاں بخوبی انجام دوں، دونوں کو یکساں اہمیت دوں، آج بھی میں اپنی والدہ کے پاس ہمیشہ کی طرح پہلے جاتا ہوں۔
