سیہون: وزیر اعلیٰ سندھ مراد علی شاہ نے دعویٰ کیا ہے کہ پاکستان پیپلز پارٹی بجٹ سے قبل کینالز منصوبہ مسترد کروائے گی، ہمارے ہوتے ہوئے سندھ کے خلاف کوئی بھی سازش نہیں کر سکتا۔
بھان سعید آباد میں میڈیا سے گفتگو میں وزیر اعلیٰ سندھ نے کہا کہ چیئرمین پیپلز پارٹی بلاول بھٹو زرداری وزیر اعظم شہباز شریف سے کہہ چکے ہیں کہ کینالز کے معاملے پر عوام کے ساتھ ہیں، سوشل میڈیا پر تاثر دیا گیا کہ سندھ کے عوام پیپلز پارٹی سے ناراض ہیں لیکن عمرکوٹ والوں نے سازشی عناصر کو واضح پیغام دیا کہ عوام ہمارے کے ساتھ ہیں۔
یہ بھی پڑھیں: نہروں کا منصوبہ واپس نہ لینے پر بلاول بھٹو کا حکومت کے ساتھ نہ چلنے کا اعلان
مراد علی شاہ نے کہا کہ کینالز کے خلاف 25 اپریل کو سکھر میں جلسہ ہوگا کیونکہ احتجاج کرنا پورے سندھ کا حق ہے کسی کو نہیں روکا، کل کے جلسے میں تمام جماعتوں کو شرکت کرنی چاہیے تھی، میں نے خود کینالز کے معاملے پر سروے کروایا جو کام ہوا تھا وہ اب بند ہو چکا ہے۔
انہوں نے کہا کہ بطور وزیر اعلیٰ سندھ میں نے وفاق کے سامنے بھرپور مؤقف رکھا ہے، ہم کینالز کے خلاف مشترکہ مفادات کونسل میں گئے جہاں ہمارے احتجاج کے بعد ایکنک اجلاس سے کینالز کا ایجنڈا نکالا گیا۔
ان کا کہنا تھا کہ مسلم لیگ (ن) کے لوگوں نے کینالز کے بارے میں غلط بیانی کی اور بعد میں معافی مانگی۔
گزشتہ روز حیدر آباد میں جلسے سے خطاب میں بلاول بھٹو زرداری نے کینالز منصوبہ واپس نہ لینے پر وفاقی حکومت کے ساتھ نہ چلنے کا اعلان کیا تھا۔
بلاول بھٹو زرداری نے کہا کہ شیر والوں کا ہر منصوبہ کسان دشمن اور ہاری دشمن ہوتا ہے یہ شیر والے عوام کا خون چوستے ہیں اور کچھ نہیں کرتے، پہلے انہوں نے گندم اسکینڈل کے ذریعے کسانوں کا معاشی قتل کیا، زرعی ٹیکس کے نام پر انہوں نے کسانوں اور ہاریوں کا جینا دوبھر کر دیا۔
انہوں نے کہا کہ کسانوں اور ہاریوں کے معاشی قتل کا بندوبست تو ہو چکا ہے، اب یہ لوگ کہہ رہے ہیں کہ ریگستان کو زرعی زمین بنائیں گے، یہ لوگ چولستان میں ریگستان پر کاشت کرنا چاہتے ہیں۔
’پانی موجود ہی نہیں، قلت ہے تھرپارکر اور چولستان بھی ہمارے ہی علاقے ہیں، کیوں نہیں چاہوں گا کہ تھرپارکر اور چولستان میں ترقی ہو، تھرپارکر اور چولستان کو آباد کرنا ہے تو بسم اللہ مگر دریائے سندھ پر سودا قبول نہیں کریں گے۔ کینالز منصوبہ نہ روکا تو حکومت کے ساتھ نہیں چل سکتے۔‘
