کراچی: وزیر اعلیٰ سندھ مراد علی شاہ نے ٹی ٹوئنٹی ورلڈ کپ کے میچ میں امریکا کے ہاتھوں پاکستان کی شکست پر تبصرہ کرتے ہوئے اہم بات بتا دی۔
نیا ناظم آباد میں جم خانے کی افتتاحی تقریب سے خطاب کرتے ہوئے وزیر اعلیٰ مراد علی شاہ نے کہا کہ ہم امریکا سے اس لیے ہارے کیونکہ عالمی مالیاتی فنڈ (آئی ایم ایف) سے بات چیف چل رہی ہے۔
مراد علی شاہ نے پاک بھارت میچ کے بارے میں کہا کہ آج پاکستان اور بھارت کا بڑا کرکٹ میچ ہے لیکن ہم انڈیا کو مزا چکھائیں گے۔ ساتھ ہی انہوں نے اعلان کیا کہ اگر ہماری ٹیم جیت گئی تو ہم نیا ناظم آباد میں استقبالیہ دیں گے۔
تقریب میں ان کا کہنا تھا کہ جم خانے میں جدید سہولت فراہم کی گئی ہیں، کچی آبادی کے مکینوں کو بھی سہولت کی فراہمی کیلیے اقدامات کر رہے ہیں، ہم پبلک پرائیوٹ پارٹنرشپ تحت کچی آبادیوں کی بہتری کیلیے کام کریں گے، سندھ حکومت نے شاہراہ نورجہاں کی بھی تعمیر کی ہے۔
انہوں نے کہا کہ شہر کے لوگوں کو سہولت کی فراہمی کیلیے مختلف منصوبے جاری ہیں، 2022 میں صوبے کو بڑے سیلاب کا سامنا کرنا پڑا جس سے کچے مکانات گرے، سیلاب زدگان کیلیے 21 لاکھ مکانات کی تعمیر کا منصوبہ شروع کیا جس میں سے سوا لاکھ گھر تعمیر کیے جا چکے ہیں۔
وزیر اعلیٰ سندھ نے کہا کہ اس وقت 8 لاکھ گھروں کی تعمیر کا کام جاری ہے، سیلاب متاثرین کے گھروں کی تعمیر میں کوئی ٹھیکیدار نہیں، ایک گھر کی تعمیر پر 3 لاکھ کا خرچہ آتا ہے، ابھی تک 2.1 بلین روپے سے 7000 گھروں کی تعمیر کیلیے عطیات ملے ہیں۔
مراد علی شاہ نے کہا کہ سندھ حکومت ہر ضلع میں یوتھ سینٹر قائم کر رہی ہے، اس سال 23 اضلاع میں یوتھ سینٹرز بن جائیں گے جن میں جم خانہ والی سہولت ہوں گی۔
