اسلام آباد: وفاقی وزیر برائے مواصلات مراد سعید کا کہنا ہے کہ محکمہ ڈاک ایکسپورٹ پارسل کا انعقاد 14 جنوری سے کرے گا، پاکستان پوسٹ ملک کا سب سے پرانا ادارہ ہے اور سب سے زیادہ خسارے میں ہے۔
تفصیلات کے مطابق وفاقی وزیر مواصلات مراد سعید نے پریس کانفرنس سے خطاب کرتے ہوئے کہا کہ 15 جنوری سے ای کامرس کا آغاز کردیں گے، 23 مارچ کو باقاعدہ لاجسٹک کی مارکیٹ میں جا رہے ہیں۔
مراد سعید نے کہا کہ ہم خواتین کو گھر کی دہلیز پر پیسہ پہنچائیں گے۔ ہم نے ایک کروڑ لوگوں کو روزگار دینا ہے، میڈیا اور پاکستان پوسٹ کے ملازمین و افسران کا شکر گزار ہوں۔
انہوں نے کہا کہ پاکستان پوسٹ ملک کا سب سے پرانا ادارہ ہے۔ سب سے خسارے میں بھی محکمہ ڈاک ہے۔ 52 ارب روپے پاکستان پوسٹ کا خسارہ ہے۔
وفاقی وزیر کا کہنا تھا کہ ہم نے ایک دن میں ڈیلیوری کی سہولت چند شہروں میں دی، کوئی محکمہ ڈاک نہیں جاسکتا تو محکمے کے لوگ آپ کے گھر پہنچائیں گے۔ 10 روز میں ملک کے بڑے شہروں میں سروس لانچ کر رہے ہیں۔ تمام شکایات کو خود دیکھ رہا ہوں۔
انہوں نے مزید کہا کہ صارفین کی شکایات کو مد نظر رکھتے ہوئے محکمہ ڈاک کو بہتر بنائیں گے، محکمہ ڈاک ایکسپورٹ پارسل کا انعقاد 14 جنوری سے کرے گا۔
