اسلام آباد : وفاقی وزیر مراد سعید نے انہیں چائے پلانے والے عمرکوٹ کے ایک ڈھابے والے کو دھمکیاں ملنے پر بذریعہ ٹیلی فون اس کی خیریت دریافت کی ہے۔
ان کا کہنا ہے کہ پیپلز پارٹی والوں کا خوف بتا رہا ہے یہ بوکھلاہٹ کا شکار ہو چکے ہیں، ہر اٹھنے والی آواز کو دبانے کے لیے پولیس کا استعمال کیا جاتا ہے۔
وفاقی وزیر مراد سعید نے عمر کوٹ میں چائے کے ڈھابے کے مالک دلیپ مکھی کو ٹیلی فون کیا اور اس کی خیریت دریافت کی۔
چند روز قبل وفاقی وزیر مراد سعید سندھ کے شہر عمر کوٹ جلسے کے بعد اس کے ڈھابے پر رکے تھے مراد سعید کے واپسی کے بعد سندھ انتظامیہ نے ڈھابے پر متعدد چھاپے مارے اور دلیپ مکھی دھمکیاں دیں۔اس واقعے کی ایک ویڈیو بھی سامنے آئی تھی۔
وفاقی وزیر مراد سعید سے گفتگو کرتے ہوئے دلیپ مکھی نے انہیں بتایا کہ ڈھابا کافی وقت سے موجود ہے لیکن پہلے کبھی نوٹس نہیں آیا، انتظامیہ والے پہلی دفعہ یہاں آئے اور پارٹی جھنڈا اتارنے کا کہا۔
مراد سعید نے دلیپ مکھی کو تسلی دیتے ہوئے کہا کہ آپ نے کسی قسم کی ٹینشن نہیں لینی اور گھبرانا نہیں ہے میں 29دسمبر کو سکھر اور 30کو لاڑکانہ آرہا ہوں، جس پر اس نے کہا کہ ہم ٹینشن لینے والے نہیں، بس پھر جب آئیں تو آپ کو چائے میرے ڈھابے پر ہی پینی ہے۔
مراد سعید کا مزید کہنا تھا کہ سندھ کے حکمرانوں نے صوبے کی جو حالت کی ہے اس پر دل دکھی ہے، پینے کا پانی زہریلا ہے، صحت کی سہولت نہیں، اسکولوں میں گائے، بھیڑ بکریاں بندھی ہیں۔
انہوں نے کہا کہ سندھ پولیس زرداری کے بہادر بچے بن کر وردی میں موت بانٹ رہی ہے، یہاں گندم باقی پاکستان سے 350روپے مہنگی مل رہی ہے، ہر اٹھنے والی آواز کو دبانے کے لیے پولیس کو استعمال کیا جاتا ہے۔
وفاقی وزیر مراد سعید کو چائے پلانے پر ڈھابے والا مشکل میں پڑ گیا
مراد سعید نے کہا کہ سندھ کے حکمرانوں کا خوف بتا رہا ہے یہ بوکھلاہٹ کا شکار ہو چکے ہیں، مرادعلی شاہ، زرداری کی کرپشن کے سہولت کار نہ بنیں بلکہ سندھ کے عوام کے لیے آسانیاں پیدا کریں۔
پی ٹی آئی رہنما کا مزید کہنا تھا کہ یہ لوگ سندھ میں 10لاکھ روپےکےعلاج والے صحت کارڈ کے کیوں خلاف ہیں اشیائے خورو نوش کے لیے سبسڈی دینے پر تمام صوبے راضی ہیں لیکن سندھ حکومت اس کے خلاف کیوں ہے؟
