لاہور: پنجاب کے دارالحکومت لاہور کے علاقے باغبانپورہ میں 7 سالہ بچی کو مبینہ طور پر اس کے ہمسائے نے اغوا کے بعد قتل کردیا۔
اے آر وائی نیوز کی رپورٹ کے مطابق باغبانپورہ کے علاقے میں 7 سالہ بچی نبیلہ کو مبینہ طور پر اس کے ہمسائے نے اغوا کے بعد قتل کردیا، پولیس نے کارروائی کرتے ہوئے ملزم کو گرفتار کرلیا۔
ذرائع کے مطابق بچی کو گزشتہ روز اغوا کیا گیا تھا اور ایک روز بعد اس کی لاش گلی میں کوڑے پھینکنے والی جگہ سے برآمد ہوئی، بچی بازار سے سودا لینے گئی تھی جس کے بعد لاپتا ہوگئی تھی۔
پولیس کا کہنا ہے کہ بچی کے جسم پر تشدد کے نشانات ہیں، ملزم ندیم مقتول بچی کا دور کا رشتہ دار اور ایک بچے کا باپ ہے، وہ لواحقین کے ساتھ بچی کو تلاش کرتا رہا، شک گزرنے پر پولیس نے ملزم کے گھر کی تلاشی لی تو وہاں سے بچی کی چپلیں برآمد ہوئیں۔
ذرائع کے مطابق بچی کی والدہ قوت گویائی سے محروم ہیں اور والد محنت مزدوری کرکے گزر بسر کرتے ہیں، لواحقین نے ملزم کو قرار واقعی سزا دینے کا مطالبہ کیا۔
ایس پی کینٹ کا کہنا ہے کہ باغبانپورہ پولیس نے بچی کے اغوا اور قتل کے ملزم ندیم کو گرفتار کرلیا ہے، ملزم بچی کا ہمسایہ ہے، بچوں کے ساتھ تشدد کرنے والے عناصر کے ساتھ آہنی ہاتھوں سے نمٹا جائے گا۔
