فیصل آباد : دو طلبا کے قتل کیس میں تین پولیس اہلکاروں سمیت چار افراد کو سزائے موت سنادی گئی ، مجرمان کو دس لاکھ روپے جرمانے کی سزا بھی سنائی گئی۔
تفصیلات کے مطابق فیصل آباد کی عدالت میں دو طلبا کے قتل کیس کی سماعت ہوئی، ایڈیشنل سیشن جج فیصل آباد سنجیدہ اختر نے سماعت کی۔
ایڈیشنل سیشن جج نے دوہرے قتل کیس میں ملوث تین پولیس اہلکاروں سمیت چار ملزمان کو سزائے موت کا حکم سنا دیا۔
ملزمان ہیڈ کانسٹیبل اصغر علی ، کانسٹیبلز فلک شیر ، فیصل اور رضاکار وقاص کو سزائے موت اور فی کس بیس لاکھ روپے جرمانے کی سزا سنائی گئی جبکہ نامزد ملزم اے ایس آئی جاوید اختر کو بری کرنے کا حکم دیا۔
ملزمان ن چھ سال قبل ناکے پر فائرنگ کر کے میٹرک کے طالبعلم ارسلان اور عثمان کے قتل کے بعد پولیس مقابلہ ظاہر کرنے کی کوشش کی تھی۔
یاد رہے آٹھ اگست 2018 کو مسلم ٹاؤن کے رہائشی دو دوست میٹرک کے طالبعلم ارسلان اور عثمان موٹرسائیکل پر جا رہے تھےکہ باغ والی پلی ناکے پر تعینات تھانہ ملت ٹاؤن کے ہیڈ کانسٹیبل اصغر علی ، کانسٹیبلز فلک شیر ، فیصل اور رضاکار وقاص نے ان پر فائرنگ کر دی، جس سے دونوں جاں بحق ہو گئے تھے۔
بعد ازاں ملزمان کے خلاف تھانہ ملت ٹاؤن میں قتل کا مقدمہ درج کیا گیا تھا۔
