کراچی: پاکستان پیپلز پارٹی کے نامزد میئر مرتضیٰ وہاب نے گزشتہ رات یو سی چیئرمینوں کے اعزاز میں عشائیہ دیا جس میں وزیر اعلیٰ سندھ مرادعلی شاہ اور فریال تالپور نے بھی شرکت کی۔
تفصیلات کے مطابق میئر کراچی کے الیکشن کے سلسلے میں پیپلز پارٹی کے نامزد میئر مرتضیٰ وہاب نے یو سی چیئرمینز کے اعزاز میں عشائیہ دیا، جس میں پی پی کے 155 یو سی چیئرمین شریک ہوئے۔
رہنما پیپلز پارٹی فریال تالپور نے تقریب سے خطاب میں کہا کل آپ کوڈسپلن کا مظاہرہ کرنا ہے، بلاول بھٹو اور آصف علی زرداری آپ کو دیکھ رہے ہوں گے، ان کی نظریں آپ پر ہیں۔
فریال تالپور نے کہا الیکشن کا نتیجہ دیکھ کر قیادت آپ پر فخر محسوس کرے گی، پارٹی قیادت آپ کو دیکھ رہی ہوگی اُن کا سر فخر سے بلند کرنا آپ کا کام ہے، مرتضیٰ وہاب اور سلمان مراد کو ایڈوانس مبارک دیتی ہوں۔
آج پیپلز پارٹی کو سرپرائز ملے گا: حافظ نعیم
وزیر اعلیٰ سندھ نے کہا کل تک صبر کیجیے گا جب تک نتیجہ نہیں آ جاتا تب تک انتظار کیجیے گا، میئر کے الیکشن کے بعد ڈپٹی میئر کو دوبارہ ووٹ دینا، کل آپ سب کو نظم و ضبط برقرار رکھنا ہے، صبر کے لیے دوائی چاہیے تو میں ساتھ لایا ہوں۔ نثار کھوڑو نے کہا یاد رکھو پولنگ بند کرانے کا الزام ہم پر نہ آئے، کل صبر کا دامن تھامے رکھنا ہے۔
سعید غنی نے کہا جماعت اسلامی رکاوٹ ڈالنے کی کوشش کرے گی، کہ الیکشن کا عمل ممکن نہ ہو، جماعت والے ہر حربہ استعمال کر کے الیکشن ٹالنے کی کوشش کریں گے، ہم سب نے ذمہ داری سے اس عمل کو ہر حال میں مکمل کرانا ہے۔
