کراچی: مشیر سندھ حکومت مرتضیٰ وہاب نے لینڈ فل سائٹ جام چاکرو کے دورے کے دوران کہا کہ شہر میں ابھی 16 لاکھ ٹن کے قریب کچرا موجود ہے۔
تفصیلات کے مطابق وزیر اعلیٰ سندھ مراد علی شاہ کے مشیر مرتضیٰ وہاب نے لینڈ فل سائٹ جام چاکرو کا دورہ کیا۔ سندھ سالڈ ویسٹ مینجمنٹ کے ایم ڈی بھی مرتضیٰ وہاب کے ہمراہ تھے۔
اس موقع پر میڈیا سے گفتگو کرتے ہوئے مرتضیٰ وہاب کا کہنا تھا کہ سندھ حکومت کے تحت 4 اضلاع ہیں، کل 252 ٹرک آئے، 220 ٹرک سندھ حکومت کے یہاں آئے۔ شہر میں جہاں کچرا نظر آرہا ہے وہ کے ایم سی اور دیگر ڈی ایم سیز کا ہے۔
مرتضیٰ وہاب کا کہنا تھا کہ شہر میں پورٹ قاسم اور کے پی ٹی کا کچرا بھی جمع ہوتا ہے۔ کراچی سے کچرا بلاشبہ اٹھایا جارہا ہے۔ انصافی دوست کچرے پر سیاست سے گریز کریں۔
انہوں نے کہا کہ ہم نے مل کر کام کرنا ہے، شہر میں ابھی 16 لاکھ ٹن کے قریب کچرا موجود ہے۔ سندھ حکومت کی جو ذمہ داری ہے وہ پوری کر رہے ہیں۔
خیال رہے کہ مون سون کے موسم میں بے تحاشہ بارشوں کے بعد شہر آفت زدہ ہوچکا ہے، شہر میں بارش کے دوسرے سلسلے کے بعد سے کچرا اٹھانے کا کام بند رہا۔ ڈی ایم سیز اور سندھ سالڈ ویسٹ مینجمنٹ آلائشیں اور کچرا اٹھانے میں ناکام رہیں۔
بارشوں اور عید قرباں کی وجہ سے بلدیہ وسطی، کورنگی، شرقی، جنوبی اور غربی حصے میں صورتحال ابتر ہوگئی۔ سیوریج کے پانی میں خون کی آمیزش شامل ہوگئیں اور باقیات سڑنے سے گندگی و غلاظت کے ڈھیر میں اضافہ ہوگیا۔
