The news is by your side.

Advertisement

فضائی عجائب گھر: سعودی عرب میں انوکھی پرواز کا افتتاح

ریاض: سعودی عرب میں دنیا کے پہلے فضائی عجائب گھر والی پرواز کا افتتاح کردیا گیا، طیارے میں مسافروں کو تاریخی شہر العلا سے ملنے والے نوادرات دکھائے گئے۔

سعودی ویب سائٹ کے مطابق سعوی عرب سے تاریخی شہر العلا جانے والی پرواز میں مسافروں کو فضا میں عجائب گھر کا نظارہ کروایا جائے گا۔

آسمان یا فضاؤں میں دنیا کے پہلے میوزیم کا نظارہ کرنے کے لیے سعودی ایئر لائن اور العلا کے اشتراک سے پہلی پرواز میں مہمانوں کا پرتپاک استقبال کیا گیا۔

اس پرواز کا اہتمام تاریخی شہر العلا کی اہمیت کو اجاگر کرنے کے لیے کیا گیا۔ پرواز میں آثار قدیمہ کے صرف ایک چھوٹے سے حصے کی نشاندہی کی گئی ہے اور وہاں سے کھدائی کے دوران ملنے والے نوادرات کا ایک نمونہ بھی دکھایا جس پر اس وقت ماہرین تحقیق کر رہے ہیں۔

علاوہ ازیں اس پرواز کے دوران ڈسکوری چینل کی دستاویزی فلم قدیم عرب کے معمار کو بھی نشر کیا گیا، جس میں عالمی ماہرین آثار قدیمہ کی ٹیم کو سعودی عرب میں قدیم پتھر کے ڈھانچے کے ایک سیٹ کی تحقیقات کرتے ہوئے دکھایا گیا ہے۔

العلا 2 ہزار سال قدیم شہر ہے جو مدائن صالح کے شاندار شاہانہ مقبروں کے لیے شہرت رکھتا ہے، یہاں قبل اسلام کے باشندے نباطین آباد تھے جنہوں نے پہاڑوں کی چٹانوں کو تراشا تھا اور پڑوسی ملک اردن میں بترا کا شہر بھی تعمیر کیا تھا۔

اب یہاں فرانسیسی اور سعودی ماہرین آثار قدیمہ کی ایک ٹیم پانچ مختلف مقامات پر دادانی اور لحیانی تہذیبوں کے آثار جاننے کے لیے کھدائی کر رہی ہے، یہ دونوں تہذیبیں 2 ہزار سال قبل پھلی پھولی تھیں اوراہم علاقائی طاقتیں سمجھی جاتی تھیں۔

العلا میں ہونے والی اس کھدائی کے دوران تاریخ کے کئی سربستہ رازوں سے پردہ اٹھ رہا ہے، اسکائی میوزیم فلائٹ انہی تحقیقات سے روشناس کروانے کے لیے متعارف کروائی گئی ہے۔

Comments

یہ بھی پڑھیں