اسلام آباد: کشمیری حریت رہنما یٰسین ملک کی اہلیہ مشعال ملک کا کہنا ہے کہ اقوام متحدہ کو مسئلہ کشمیر کے حل کے لیے کردار ادا کرنا ہوگا۔ نام نہاد جمہوریت بھارت نے پرامن احتجاج پر مظاہرین کو جیل میں ڈال رکھا ہے۔
تفصیلات کے مطابق وفاقی دارالحکومت اسلام آباد میں پاک بھارت تعلقات اور مقبوضہ کشمیر کے حالات پر سیمینار منعقد ہوا۔ کشمیری حریت رہنما یٰسین ملک کی اہلیہ مشعال ملک نے تقریب سے خطاب کیا۔
اپنے خطاب میں مشعال ملک کا کہنا تھا کہ ایک ایک ماہ مقبوضہ کشمیر میں کرفیو نافذ رہتا ہے، نہتے کشمیریوں کو پیلیٹ گنز سے مارا جارہا ہے۔ وادی میں بھارتی مظالم معمول ہیں۔
مشال ملک کا کہنا تھا کہ سینکڑوں، ہزاروں کشمیریوں کو بھارتی قابض فوج نے مار دیا۔ اقوام متحدہ کو مسئلہ کشمیر کے حل کے لیے کردار ادا کرنا ہوگ۔ نام نہاد جمہوریت بھارت نے پرامن احتجاج پر مظاہرین کو جیل میں ڈال رکھا ہے۔
انہوں نے کہا کہ پاکستان اور بھارت کی موجودہ صورتحال میں مذاکرات سب سے بہترین حل ہے۔
اس سے قبل ایک موقع پر مشعال ملک نے اپنے پیغام میں کہا تھا کہ مقبوضہ کشمیرکی ہرعورت انصاف چاہتی ہے۔ انہوں نے کہا تھا کہ مقبوضہ کشمیر میں بھارتی فوج عصمت دری کو بطور ہتھیار استعمال کرتی ہے، مقبوضہ کشمیرمیں سب سے بڑی تعداد میں آدھی بیوہ خواتین ہیں۔
مشعال ملک نے مزید کہا تھا کہ کشمیر کی تحریک آزادی میں شریک خواتین کو مظالم کا سامنا ہے، مقبوضہ کشمیر میں خواتین کو حقوق کب ملیں گے؟
