اسلام آباد : کشمیری حریت رہنما یاسین ملک کی اہلیہ مشعال ملک کا کہنا ہے کہ مسئلہ کشمیر فرنٹ لائن پر لانے کا آئیڈیل وقت ہے، مطالبہ کرتی ہوں گرفتار حریت رہنماوں کو فوری رہا کیا جائے۔
تفصیلات کے مطابق کشمیری حریت رہنما یاسین ملک کی اہلیہ مشعال ملک نے پریس کانفرنس کرتے ہوئے کہا کہ مسئلہ کشمیر کو فرنٹ پر لانے کا یہ آئیڈیل وقت ہے، خطے کا اصل مسئلہ یہی ہے، ورنہ بھارت کا فالس فلیگ آپریشن کا سلسلہ جاری رہے گا۔
حریت رہنما کی اہلیہ کا کہنا تھا کہ مودی کا ٹریک ریکارڈ اچھا نہیں ہے، ووٹ کیلئے مودی معاملات کوایٹمی جنگ کی طرف لیجانےسےگریز نہیں کرتا لیکن مودی کوبدترین شکست ہوئی اب وہ کسی کاسامنا نہیں کر پا رہا۔
انھوں نے کہا کہ امریکا کی جانب سے ثالثی کی پیشکش کا مطلب ہے مسئلہ کشمیر بھارت کا اندورنی نہیں کثیرالجہتی مسئلہ ہے، مذاکرات کیلئے امریکا اور چین کابہت اہم رول ہو سکتا ہے۔
کشمیری رہنما کا کہنا تھا کہ شملہ معاہدے پر نظر ثانی کر کے اس کو مسترد کیا جائے اور مطالبہ کرتی ہوں گرفتار حریت رہنماوں کو فوری رہا کیا جائے۔.
گزشتہ روز امریکی صدر ٹرمپ نے مسئلہ کشمیر حل کرنے کی خواہش کا اظہار کیا تھا، پاکستان اور بھارت کے درمیان جنگ بندی کے بعد امریکی صدر نے سوشل میڈیا پر جاری پیغام میں کہا تھا کہ پاکستان اوربھارت کے ساتھ مل کرکام کروں گا اور دیکھوں گا کیا ‘ہزاروں سال بعد’ مسئلہ کشمیر کا کوئی حل نکل سکتا ہے۔
