واشنگٹن : امریکی مسلمانوں میں صدر ٹرمپ کی جانب سے بعض مسلمان ممالک کے شہریوں کی امریکا آمد پر پابندی کے خلاف غم و غصہ پایا جاتا ہے، امریکی مسلمانوں نے وائٹ ہاؤس کے باہر باجماعت نماز ادا کی، مسلمانوں کا کہنا ہے کہ اسلام کو جتنا دباؤ گے، اتنا وجود میں آئے گا۔
سات مسلم ممالک کے شہریوں کی امریکہ میں داخلہ پر پابندی سے متعلق صدر ڈونلڈ ٹرمپ کے متنازعہ حکمنامہ کے خلاف امریکی مسلمانوں نے وائٹ ہاؤس کے باہر باجماعت نماز ادا کرکے ڈونلڈ ٹرمپ کو واضح پیغام دیا۔
اس واقعے کی ویڈیو بھی سوشل میڈیا پر وائرل ہورہی ہے، جس میں دیکھا جا سکتا ہے کہ تمام مسلمان باجماعت نماز ادا کررہے ہیں۔
صدر ڈونالڈ ٹرمپ کے متنازعہ حکمنامہ کے خلاف امریکیوں کا احتجاج آج سارے ملک میں پھیل گیا ہے، مظاہرین سات مسلم ممالک کے عوام اور دیگر چند ممالک کے پناہ گزینوں سے ہمدردی اور یگانگت کا اظہار کررہے ہیں۔
اس سے قبل بھی امریکہ میں مقیم مسلمان ہوائی اڈوں پر اجتماعی عبادت کرتے بھی دکھائی دیے، اس عمل کو بعض حلقے مسلمان کے ساتھ یکجہتی کے طور پر دیکھ رہے ہیں تو بعض، بالخصوص صدر ٹرمپ کے حامی، اسلامی انتہا پسندی کا ایک مظہر بھی قرار دے رہے ہیں۔
