پاکستان تحریک انصاف کی رہنما مسرت چیمہ نے کہا ہے کہ پی ڈی ایم ٹولے نے ہر حربہ آزما لیا لیکن انکا گراف اوپر نہیں جارہا ہے۔
اے آر وائی نیوز کے مطابق مسرت چیمہ نے کہا ہے کہ یہ بضد ہیں ان کا سیاسی گراف اوپر جائیگا تو ملک میں انتخابات ہونگے، ملک اس نہج پر پہنچ رہا ہے جہاں سے واپسی کا کوئی راستہ نہیں بچے گا۔
انہوں نے کہا کہ امپورٹڈ ٹولہ اپنی سیاست بچانے کیلئے آئین کیخلاف سازش کر رہا ہے، ملک کو کرپشن سے لتھڑی اپنی سیاست کی بھینٹ چڑھانا چاہتے ہیں۔
پی ٹی آئی رہنما نے کہا کہ عوام نے فیصلہ کر لیا اب وہ شریف، زرداری کی سیاست کا سکہ نہیں چلنے دینگے، ملک کو آگے لے جانا ہے تو عمران خان کو دیوار سے لگانے کی سوچ بدلنا ہوگی۔
مسرت چیمہ کا کہنا تھا کہ بڑھک مارنیوالے اسحاق ڈارنے منی بجٹ سے عوام کو نکیل ڈال دی، اس قدر مہنگائی کر دی کہ اب آٹا ، گھی ،دالیں، چکن بھی لگژری آئٹمز ہیں۔