کراچی: مصطفیٰ اغوا کیس میں اہم پیشرفت سامنے آئی ہے جس میں پولیس کو جلی ہوئی گاڑی اور اس کے اندر لاش مل گئی۔
ایس ایچ او دھوراجی کے مطابق بلوچستان کے شہر حب کے علاقے دھوراجی سے گاڑی جلی ہوئی ملی، گاڑی مصطفیٰ کی ہے یا کسی اور کی اس بات کی تصدیق کی جا رہی ہے۔
انہوں نے بتایا کہ گاڑی سے لاش بھی ملی ہے جو جلی ہوئی تھی، لاش کو سردخانے منتقل کر دیا گیا۔ مصطفیٰ نامی نوجوان کے اغوا کا واقعہ 11 جنوی 2025 کو پیش آیا تھا۔
یہ بھی پڑھیں: ڈیفنس کے علاقے سے اغوا نوجوان مصطفیٰ کیس میں اہم پیشرفت
گزشتہ روز اینٹی وائلنٹ کرائم سیل پولیس نے ملزم ارمغان کے ریمانڈ حاصل کرنے کی تیاری کی، سندھ ہائیکورٹ کے 2 رکنی بینچ سے گرفتار ملزم ارمغان کی ریمانڈ کی استدعا کی جائے گی۔
پولیس کا کہنا تھا کہ ملزم کے بنگلے سے مغوی مصطفیٰ عامر کا موبائل بھی ملا تھا، ارمغان کو جب گرفتار کیا گیا تو وہ نشے میں تھا اور متضاد بیانات دے رہا تھا تاہم مغوی مصطفیٰ عامر کی گاڑی بھی اب تک برآمد نہیں کی جا سکی۔
اس سے ایک روز قبل نسداد دہشتگردی عدالت میں مصطفیٰ کیس کی سماعت ہوئی تھی جس میں ملزم ارمغان کو دوبارہ جسمانی ریمانڈ پر پولیس کے حوالے کرنے کی درخواست دائر کی گئی تھی۔
عدالت نے پولیس کے ملزم ارمغان کی جسمانی ریمانڈ کی درخواست ایک مرتبہ پھر مسترد کر دی تھی اور واقعے کی مکمل تحقیقات کیلیے جے آئی ٹی تشکیل دینے کا حکم دیا تھا۔
عدالت نے گرفتار ملزم ارمغان کو 10 فروری 2025 کو جیل بھیج دیا تھا، پولیس نے مؤقف اختیار کیا تھا ارمغان کے گھر سے اسلحہ برآمد ہوا ہے، ملزم سے غیر قانونی اسلحہ سے متعلق علیحدہ تفتیش کرنی ہے۔
