کراچی:پاک سرزمین پارٹی کے چیئر مین مصطفی کمال نے امجد فرید صابری کے بڑے بھائی ثروت صابری سے ٹیلی فون پر گفتگو کی اور امجد فرید صابری کے بہیمانہ قتل پر ان سے اپنے گہرے دکھ اور افسوس کا اظہارکیا۔
مصطفی کمال نے کہا کہ پاک سرزمین پارٹی امجد فرید صابری کے خاندان کے اس غم میں برابر کی شریک ہے، امجد صابری سے میرا گہرا تعلق تھا اور وہ میرا ذاتی دوست تھا، اس کے دردناک قتل پر شدید الفاظ میں مذمت کرتے ہیں۔
سید مصطفی کمال کا کہنا تھا کہ امجد صابری جیسے عظیم فنکار صدیوں میں پیدا ہوتے ہیں، بلاشبہ وہ ایک بڑا قوال ہونے کے ساتھ ساتھ ایک عظیم انسان بھی تھا، امجدصابری نے دنیا بھر میں پاکستان کا نام روشن کیا۔
مصطفی کمال نے امجد فرید صابری کے لیے مغفرت اور خاندان کے لیے صبر جمیل کی دعا کی۔
امجد صابری کے بھائی ثروت صابری نے اس مشکل وقت میں ساتھ دینے پر پاک سرزمین پارٹی کے چیئرمین مصطفی کمال کا شکریہ ادا کیا۔
