کراچی : چیئرمین پی ایس پی مصطفیٰ کمال نے کہا ہے کہ کراچی کے عوام اختیار چھین کر لیں گے، ڈولفن ہے جو کراچی والوں کی جان بچا رہی ہے، ہم الیکشن جیت چکے ہیں بس ڈولفن پر مہر لگانے کی رسم ادا کرنی ہے۔
یہ بات انہوں نے فور کے چورنگی سے نمائش چورنگی تک نکالی جانے والی انتخابی ریلی کے شرکاء سے خطاب کرتے ہوئے کہی، اس موقع پر انیس قائم خانی،رضا ہارون سمیت دیگر اہم رہنما بھی موجود تھے، ریلی میں شرکاء نے پارٹی کے جھنڈے اٹھائے ہوئے تھے۔
مصطفیٰ کمال کا کہنا تھا کہ25جولائی کو کراچی بتا دے گا وہ کس کے ساتھ ہے، جب بیلٹ باکس کھلے گے تو صرف ڈولفن کی آواز آئے گی، پی ایس پی ایک ڈولفن ہے جو کراچی والوں کی جان بچا رہی ہے، پاک سر زمین پارٹی کراچی اور سندھ سے الیکشن جیت چکی ہے بس ڈولفن پر مہر لگانے کی رسم ادا کرنی ہے۔
انہوں نے کہا کہ سازشوں کے جال بچھانے والوں کو کہتا ہوں کہ کراچی کی جان چھوڑدو، کراچی والوں نے نظام سنبھالا تو یہ نہیں کہیں گے اختیارات نہیں، کراچی کے عوام اپنا اختیار چھین کر لیں گے۔
چیئرمین پی ایس پی نے کہا کہ اس سال سندھ کا وزیر اعلیٰ ہم بنائیں گے اور2023میں ملک کا وزیر اعظم پی ایس پی سے ہوگا۔
خبر کے بارے میں اپنی رائے کا اظہار کمنٹس میں کریں‘مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔
