مظفرگڑھ : گزشتہ روز تھرمل کالونی میں قتل ہونے والی تین بچیوں کا قاتل کوئی اور نہیں ان کا اپنا بھائی نکلا، جس نے پولیس کے سامنے اعتراف جرم کرلیا ہے۔
تفصیلات کے مطابق پولیس نے ابتدائی تحقیقات کے دوران شک کی بنیاد پر تین بھائیوں کو حراست میں لے کر تفتیش کی تو معاملہ کچھ دیر میں ہی حل ہوگیا۔
ایک بھائی نے اپنی3بہنوں کو قتل کرنے کا اعتراف کرلیا،قاتل بھائی کے مطابق اس کے گھر والے ان تینوں بہنوں سے زیادہ پیار کرتے تھے۔
پولیس کے مطابق ملزم کے بیان سے لگتا ہے وہ احساس کمتری کا شکار ہے، قاتل بھائی سے آلہ قتل بھی برآمد کرلیا گیا ہے۔
تفتیشی افسر کا کہنا ہے کہ قاتل کو پب جی کھیلنے کا بہت شوق تھا اس لیے قتل کرنے میں آسانی ہوئی۔
واقعے کا مقدمہ پولیس کی مدعیت میں تھانہ سٹی میں مقدمہ درج کیا گیا ہے، فرانزک کے عمل کے دوران تینوں بھائیوں کے ناخنوں پر خون کے نشانات پائے گئے اس کے علاوہ گزشتہ روز جب پولیس لاپتہ بچیوں کو تلاش کررہی تھی تو دونوں بھائی اس خالی مکان پر جانے سے روک رہے تھے جس سے شک کو مزید تقویت ملی۔
مقتولین فاطمہ عرشیہ اور زہرا 7 بہن بھائیوں میں تین بہنیں تھیں، ان کا ایک بھائی اپنی شادی کے بعد کراچی میں رہائش پذیر ہے جبکہ باقی تین بھائی ساتھ ہیں اور ان کے والد اپنی ملازمت کے سلسلے میں فیصل آباد میں ہوتے ہیں۔
