ماہرِ معیشت مزمل اسلم نے کہا ہے کہ پی ٹی آئی نے ساڑھے 3 سالوں میں پیٹرولیم لیوی صفر کر دی تھی، پاکستان میں تیل کی قیمتوں میں اضافے کی ایک وجہ عالمی مارکیٹ بھی ہے۔
اے آر وائی نیوز کے مطابق ماہرِ معیشت مزمل اسلم کا کہنا تھا کہ تاثر دیا گیا کہ پی ٹی آئی کے آئی ایم ایف معاہدے کی وجہ سے قیمتیں بڑھائی گئیں۔ پیٹرولیم مصنوعات کی قیمتوں پر سیلز ٹیکس پی ٹی آئی نے صفر کر دی تھی۔ پی ٹی آئی کے جانے کے بعد سب سے پہلے مفتاح اسماعیل نے 30 روپے پی ڈی ایل لگائی۔
مزمل اسلم نے کہا کہ ہم نے آئی ایم ایف سے منظوری لی تھی کہ تیل کی قیمتوں پر سیلز ٹیکس صفر رہے گا۔ روپے کی قدرکی وجہ سے تیل کی قیمتوں میں اضافہ ہوا ہے۔
ماہرمعیشت نے کہا کہ عالمی مارکیٹ میں تیل کی قیمتیں 93 ڈالر فی بیرل کے آس پاس ہیں۔ پی ٹی آئی دورمیں عالمی مارکیٹ میں تیل کی قیمت 100 ڈالر سے اوپر رہیں۔ اس وقت تیل کی قیمتوں میں فی لیٹر 100 روپے حکومتی جیب میں جا رہے ہیں،
انھوں نے کہا کہ ٹیکس ٹارگٹ کو مکمل کرنے کیلئے پی ڈی ایل گزشتہ سال 50 روپے کی گئی، اس کے باوجود ٹیکس ٹارگٹ حاصل نہیں کیا گیا۔
مزمل اسلم کا کہنا تھا کہ ٹیکس کلیکشن نہ ہونے کی وجہ سے پی ڈی ایل کو 60 روپے تک لے گئے۔ اس وقت بھی تیل کی قیمتوں کے ذریعے ٹیکس ٹارگٹ حاصل کیا جا رہا ہے۔
