کراچی: اسٹیٹ بینک آف پاکستان کے گورنر رضا باقر نے کہا ہے کہ انھیں ملک کی خدمت کا موقع ملا ہے، یہ ان کے لیے اعزاز کی بات ہے۔
تفصیلات کے مطابق گزشتہ ماہ تعینات ہونے والے گورنر اسٹیٹ بینک رضا باقر کا کہنا ہے میرے لیے اعزاز ہے کہ ملک کی خدمت کا موقع ملا، میرا مقصد اسٹیٹ بینک کو جدید بنانے پر توجہ مرکوز کرنا ہے۔
گورنر اسٹیٹ بینک رضا باقر نے کہا کہ پاکستانیوں سے کہوں گا ملک کو آپ کی ضرورت ہے۔
رضا باقر کا کہنا تھا کہ مانیٹری پالیسی کا مقصد مہنگائی کو کم کرنا ہے، شرح سود کا تعین مانیٹری پالیسی کمیٹی کرتی ہے، جب کہ مہنگائی اسٹیٹ بینک کے نوٹ چھاپنے سے ہوتی ہے۔
یہ بھی پڑھیں: گورنر اسٹیٹ بینک ڈاکٹر رضا باقر نے عہدے کا چارج سنبھال لیا
یاد رہے کہ ڈاکٹر رضا باقر کو 4 مئی کو حکومت پاکستان نے گورنر اسٹیٹ بینک تعینات کیا ہے، ڈاکٹر باقر کو تین سال کے لیے گورنر اسٹیٹ بینک آف پاکستان تعینات کیا گیا ہے۔
ڈاکٹر رضا باقر رومانیہ میں آئی ایم ایف کے مشن چیف رہ چکے ہیں، وہ 18 سال آئی ایم ایف اور 2 سال ورلڈ بینک میں کام کا تجربہ رکھتے ہیں۔
گورنر ایس بی پی آئی ایم ایف کے قرضہ پالیسی ڈویژن چیف بھی رہ چکے ہیں، ان کے تحقیقی مقالے متعدد بین الاقوامی جریدوں میں شایع ہوئے۔
