جنوب مشرقی ایشیائی ملک میانمار میں 7.7 شدت کے شدید زلزلہ کے باعث لوگوں میں خوف و ہراس پھیل گیا۔
غیر ملکی میڈیا کے مطابق زلزلہ تھائی لینڈ کے دیگر علاقوں میں بھی محسوس کیا گیا، زلزلے کی گہرائی 16 کلومیٹر اور مرکز میانمار کا شمال مغربی علاقہ تھا۔
رپورٹس کے مطابق میانمار میں زلزلہ ایک منٹ تک محسوس کیا گیا، لوگ گھروں سے باہر نکل آئے، زلزلے کے 12منٹ بعد آفر شاکس کی شدت 6.4 ریکارڈ کی گئی۔
غیرملکی میڈیا کا کہنا ہے کہ بنکاک میں زلزلے کے بعد افراتفری مچ گئی، لوگ دفاتر، مالز، گھروں سے باہر نکل آئے۔
واضح رہے کہ گزشتہ ماہ تین ممالک میں زلزلے کے جھٹکے محسوس کیے گئے تھے تاہم کہیں سے بھی جانی نقصان کی اطلاعات سامنے نہیں آئی تھیں۔
بھارتی ریاست بہار کے دارالحکومت پٹنہ میں گزشتہ ماہ زلزلے کے جھٹکے محسوس کیے گئے۔ سوئے ہوئے لوگ ہڑبڑا کر اٹھ بیٹھے اور خوفزدہ ہوکر گھروں سے باہر نکل آئے۔
نیپال کے بگمتی صوبے میں بھی اسی دوران زلزلے کے جھٹکے محسوس کیے گئے تھے تاہم یہاں بھی خوش قسمتی سے کوئی جانی یا مالی نقصان نہیں ہوا۔
نیشنل سینٹر فار سیسمولوجی کے مطابق، زلزلے کی شدت 5.5 ریکارڈ کی گئی۔ اس زلزلے کا مرکز نیپال کے باگمتی صوبے میں تھا، جو بہار کے مظفر پور سے تقریباً 189 کلومیٹر شمال میں واقع ہے۔
غزہ میں اسرائیلی فورسز کی بمباری، 50 فلسطینی شہید
اسی طرح تبت میں بھی زلزلے کے جھٹکے محسوس کیے گئے تھے، جن کی شدت 4.1 ریکارڈ کی گئی۔ ماہرین کے مطابق، اس زلزلے کا مرکز زمین کے 70 کلومیٹر گہرائی میں تھا۔
