کیلی فورنیا: امریکی ماہرین نے ٹیکنالوجی کی دنیا میں ایک اور حیران کن ایجاد کرتے ہوئے فولڈ ہونے والی منفرد موٹر سائیکل متعارف کرادی۔
تفصیلات کے مطابق امریکی کمپنی نے محض چند سیکنڈ میں فولڈ ہونے والی جدید سہولیات سے آراستہ موٹرسائیکل تیار کی جس کا وزن صرف 21 کلوگرام ہے۔
ماہرین نے اس حیران کن ایجاد کو ’مائلو ای‘ کا نام دیا جس کو بنانے کا مقصد ترقی یافتہ شہروں سے ٹرانسپورٹ اور پارکنگ کے مسائل کو فوری طور پر حل کرنا ہے، فولڈڈ موٹرسائیکل کو مخصوص رفتار تک دوڑایا جاسکتا ہے اور اس کی خاصیت یہ ہے کہ اسے پارک کرنے کے بجائے آپ فولڈ کر کے اپنے ساتھ لے کر چل سکتے ہیں۔
مزید پڑھیں: اڑنے والی ٹیکسی ، موٹرسائیکل کے بعد اب سوٹ بھی تیار
ای موٹرسائیکل کو گاڑی کی ڈکی میں آسانی کے ساتھ رکھا جاسکتا ہے جبکہ سکڑنے کے بعد اس کا کل حجم 20 انچ چوڑا اور 41 انچ لمبا ہوجاتا ہے، موٹر سائیکل میں تین پہیئے دیے گئے کیونکہ تیسرا ٹائر فولڈ ہونے کے بعد مائلو کو ایک جگہ سے دوسری جگہ منتقل کرنے میں آسانی فراہم کرتا ہے۔
چارجنگ کی سہولت سے آراستہ اس موٹرسائیکل میں 36 وولٹ کی بیٹری نصب کی گئی جو ایک بار چارج ہونے کے بعد 36 کلومیٹر تک چلنے کی صلاحیت رکھتی ہے جبکہ اس میں علیحدہ سے بیٹری لگانے کا آپشن بھی موجود ہے۔
یہ بھی پڑھیں: دبئی پولیس کا ڈرون یا فلائنگ بائیک کا کامیاب تجربہ
کمپنی کی جانب سے ای موٹرسائیکل کی قیمت 1500 ڈالر مقرر کی گئی جو پاکستانی کرنسی کے حساب سے ایک لاکھ 80 ہزار روپے کے قریب بنتی ہے، مائلو میں ہائیڈرولک ڈسک بریکس لگائے گئے جبکہ یہ 29 کلو میٹر فی گھنٹہ کی رفتار سے دوڑنے کی صلاحیت رکھتی ہے۔
