کراچی : صفورہ کے قریب فائرنگ کا پراسرار واقعہ پیش آیا ہے جس کے نتیجے میں ایک شخص کی موت واقع ہوگئی ہے پولیس نے شک کی بنیاد پر اس کے بزنس پارٹنر کو حراست میں لے لیا۔
اس حوالے سے پولیس حکام کا کہنا ہے کہ کراچی کے علاقے صفورہ گوٹھ کی نجی ہاؤسنگ سوسائٹی میں فائرنگ سے ایک شہری جاں بحق ہوگیا۔
اطلاع ملتے ہی پولیس اہلکار موقع پر ہی جائے وقوعہ پر پہنچ گئے اور متوفی کی لاش کو ابتدائی تحقیقات اور پوسٹ مارٹم کیلئے اسپتال منتقل کیا۔
پولیس کے مطابق متوفی کی شناخت اکبر کے نام سے ہوئی ہے جو نارتھ کراچی کارہائشی تھا، واقعے کی اطلاع مددگار 15 پر اکبر کے بزنس پارٹنر نے دی تھی۔
متوفی اکبر کے بزنس پارٹنر رضوان نے اپنے بیان میں واقعے کو خودکشی بتایا، جائے وقوعہ سے متوفی کا 30بور کا پستول ملا ہے۔ اکبر نے مبینہ طور پر بزنس پارٹنر کو 50 لاکھ روپے ادا کرنے تھے۔
پولیس کے مطابق اکبر کے بزنس پارٹنر کو حراست میں لے کر پوچھ گچھ کی جارہی ہے، اکبر اور رضوان گاڑیوں کی خرید و فروخت کا کام کرتے تھے۔
