لندن: ہیتھرو ایئرپورٹ پر ہنگامہ آرائی کرنے کے جرم میں ن لیگ کے 4 کارکنوں کوپولیس نے حراست میں لے لیا، ایک کارکن پر فرد جرم عائد کردی گئی، کارکنان وزیراعلیٰ شہباز شریف کا استقبال کرنے آئے تھے۔
اطلاعات کے مطابق وزیراعلیٰ پنجاب شہباز شریف کی طبی معائنے کے لیے لندن آمد کے موقع پر لیگی کارکنان ان کے استقبال کے لیے موجود تھے جو آپس میں الجھتے رہے، ان چند افراد نے نہ صرف شور شرابا کیا بلکہ ایک دوسرے کوغلیظ گالیاں دینے سے بھی گریز نہ کیا۔
واقعے کے بعد لندن ہیتھرو پر ہنگامی آرائی کے جرم میں لندن پولیس نے ن لیگی کارکن راجہ تراب پر فرد جرم عائد کردی۔
نمائندہ لندن اے آر وائی احمد علی سید کے مطابق چار اشخاص کو گرفتار کیا گیا تھا ان میں سے ن لیگی کارکن راجہ تراب پر فرد جرم عائد کردی گئی تاہم بقیہ تین کو رہا کردیا گیا۔
اطلاعات ہیں کہ راجہ تراب پر مقدمہ چلایا جائے گا بعدازاں انہیں سزا و جرمانے کا بھی امکان ہے۔
رپورٹر نے بتایا کہ افسوس ناک بات یہ ہے کہ وہاں کوریج کرنے والے صحافیوں کو مسلم لیگ ن کے لوگوں نے دھمکیاں دیں کہ اگر اس واقعہ کی کوریج اور خبر آئن ایئر کی تو آپ کے ساتھ سخت کارروائی کریں گے۔
