عمرکوٹ: حلقہ این اے 213 میں ضمنی انتخاب کے لیے پولنگ شروع ہو گئی۔

تفصیلات کے مطابق صوبہ سندھ کے شہر عمر کوٹ میں حلقہ این اے 213 میں ضمنی انتخاب کے لیے پولنگ شروع ہو گئی ہے، پولنگ کا عمل صبح 8 بجے سے شام 5 بجے تک بغیر وقفے کے جاری رہے گا۔

این اے213 کی نشست پر 18 امیدوار مد مقابل ہیں، پی پی کی صبا تالپور اور حزب اختلاف کے مشترکہ امیدوار لال مالھی میں مقابلہ ہے، حلقے میں ووٹرز کی کل تعداد 6 لاکھ 8 ہزار 997 ہے، حلقے میں 2 لاکھ 87 ہزار 311 خواتین ووٹرز شامل ہیں۔

الیکشن کمیشن نے سینیٹ کی خالی نشست پر الیکشن شیڈول کا اعلان کردیا

حلقے میں پولنگ اسٹیشنوں کی تعداد 498 ہے، 98 خواتین پولنگ اسٹیشن بھی شامل ہیں، 269 کو حساس اور 91 کو انتہائی حساس پولنگ اسٹیشن قرار دیا گیا ہے۔

این اے 213 کی نشست نواب یوسف تالپور کے انتقال کے باعث خالی ہوئی تھی، پولنگ اسٹیشن کی سیکیورٹی کے لیے 4 ہزار پولیس اہلکار تعینات کیے گئے ہیں، وزارت داخلہ کی جانب سے حلقے میں رینجرز کی تعیناتی کا نوٹیفکیشن بھی جاری کیا گیا ہے۔