اسلام آباد: قومی اسمبلی کے اسپیکر اسد قیصر نے پارلیمانی رہنماؤں سے ٹیلی فونک رابطے کرتے ہوئے کہا ہے کہ اپوزیشن کو جائز مقام دینا ان کی اوّلین ترجیحات میں سے ہے۔
تفصیلات کے مطابق اسپیکر قومی اسمبلی نے بلاول بھٹو، خورشید شاہ، خالد مقبول صدیقی، طارق بشیر چیمہ، رانا تنویر، اختر مینگل، شیخ رشید، خالد مگسی، اسعد محمود اور شاہ زین بگٹی کو فون کیے۔
قومی اسمبلی کے اسپیکر اسد قیصر نے اپوزیشن اور اتحادی رہنماؤں سے فون پر وزیرِ اعظم کے انتخاب کے دوران ایوان کی صورتِ حال پر تفصیلی تبادلۂ خیال کیا۔
اسد قیصر کا کہنا تھا کہ اختلاف رائے جمہوریت کا حسن ہے، پارلیمان کا تقدس برقرار رکھنا سب کی مشترکہ ذمہ داری ہے، اپوزیشن کو جائز مقام دینا ان کی اوّلین ترجیح ہے۔
اسپیکر قومی اسمبلی نے کہا ’توقع ہے کہ ایوان پارلیمانی روایات کی احسن انداز میں عکاسی کرے گا، سب کی مشاورت سے ایوان کی کارروائی چلانا میرا اولین فرض ہوگا۔‘
مزید پڑھیں: ایوان میں باقاعدگی سے آئیں، نو منتخب اسپیکر اسد قیصر کی وزرا کو ہدایت
پارلیمانی رہنماؤں نے فون پر تبادلۂ خیال کرتے ہوئے اسپیکر اسد قیصر کو اسمبلی کی کارروائی خوش اسلوبی سے چلانے کی یقین دہانی کرا دی۔
خیال رہے کہ 15 اگست کو تحریک انصاف کے اسد قیصر پیپلز پارٹی کے سید خورشید شاہ کے 146 ووٹوں کے مقابلے میں 176 ووٹ لے کر اسپیکر قومی اسمبلی منتخب ہوگئے تھے۔
اسپیکر اسد قیصر نے قومی اسمبلی میں قائد ایوان کی کرسی سنبھالتے ہی وزرا کو ہدایات جاری کرتے ہوئے کہا تھا کہ وہ ایوان میں باقاعدگی سے حاضری کو یقینی بنائیں۔
