لاہور: قومی احتساب بیورو (نیب) نے نواز شریف کو اپوزیشن لیڈر شہباز شریف سے ملاقات کی اجازت دے دی۔
تفصیلات کے مطابق سابق وزیراعظم نواز شریف نے چھوٹے بھائی شہباز شریف سے ملاقات کے لیے نیب کو درخواست بھیجی تھی جس کا جائزہ لینے کے بعد نیب لاہور نے نواز شریف کو ملاقات کی اجازت دے دی۔
نیب اعلامیہ کے مطابق نواز شریف کی درخواست پر انہیں زیر تفتیش اپوزیشن لیڈر شہباز شریف سے ملنے کا وقت دیا گیا ہے وہ کل شہباز شریف سے ملاقات کرسکتے ہیں۔
واضح رہے کہ نواز شریف کی نیب آفس میں شہباز شریف سے دوسری ملاقات ہوگی اس سے قبل بھی نواز شریف، مریم نواز اور حمزہ شہباز نے شہباز شریف سے ملاقات کی تھی۔
احتساب عدالت نے آشیانہ ہاؤسنگ اسکینڈل میں سابق وزیراعلیٰ پنجاب شہباز شریف کو 14 روزہ ریمانڈ پر نیب کی تحویل میں دے رکھا ہے۔
مزید پڑھیں: اسلام آباد: شہبازشریف کا نجی اسپتال میں طبی معائنہ مکمل
یاد رہے کہ آج صبح مسلم لیگ ن کے صدر اور اپوزیشن لیڈر شہباز شریف کو طبی معائنے کے لیے اسلام آباد کے نجی اسپتال لایا گیا تھا جہاں ان کے تین سی ٹی اسکین کیے گئے تھے۔
ذرائع کا کہنا تھا کہ مذکورہ سی ٹی اسکین کی رپورٹ کا جائزہ لینے کے لیے میڈیکل بورڈ کا اجلاس کل ہوگا جس کے بعد انہیں لاہور روانہ کیا جائے گا۔
