لاہور : قومی احتساب بیورو ( نیب) نے اپوزیشن لیڈر شہباز شریف کیخلاف 20 سال سے زیر التوا 12 پلاٹوں کی الاٹمنٹ انکوائری ناکافی شواہد پر بند کردی۔
تفصیلات کے مطابق قومی احتساب بیورو ( نیب) نے اپوزیشن لیڈر شہباز شریف کیخلاف 20 سال سے زیر التوا انکوائری بند کردی، شہباز شریف کیخلاف 12 پلاٹوں کی الاٹمنٹ انکوائری ناکافی شواہد پر بند کی گئی۔
نیب ذرائع کا کہنا ہے کہ انکوائری میں نامزد متعدد افراد میاں عطااللہ اور میاں رضا عطا اللہ وفات پا چکے ہیں اور شہباز شریف کے ملوث ہونے کے تاحال ٹھوس شواہد نہیں ملے ہیں۔
ذرائع کے مطابق سابق وزیراعلی پنجاب کیخلاف من پسند افراد کو بارہ پلاٹ دینے سے متعلق انکوائری 20 سال سے التوا کا شکار تھی جبکہ ان کے سیکرٹری جاوید محمود، میاں عطا اللہ، میاں رضا سمیت دیگر کیخلاف انکوائری بھی زیر التوا تھی۔
نیب ذرائع نے بتایا نیب لاہور نے سابق وزیراعلیٰ سمیت دیگر کے خلاف جون 2000 میں انکوائری کا آغاز کیا گیا تھا، ایل ڈی اے نے1978 میں موضع نواں کوٹ کی زمین گلشن راوی سوسائٹی کیلئے حاصل کی، اس کے عوض دس مرلہ کے پلاٹ فراہم کرنا تھے۔
ذرائع کے مطابق من پسند افراد کو خلاف قانون ایک کنال کے پلاٹ دیے گئے، نیب نے تفتیش شروع کیں تو مبینہ طور پر پلاٹوں کی منسوخی کا حکم دے دیا گیا۔
