اسلام آباد: عدالت نے نیب کو سابق ڈی جی شہزاد سلیم کے خلاف تادیبی کارروائی کرنے سے روک دیا ہے۔
تفصیلات کے مطابق سابق ڈی جی نیب شہزاد سلیم کے خلاف مس کنڈکٹ پر نیب میں انکوائری شروع ہونے کا انکشاف ہوا ہے، چیئرمین نیب کی جانب سے انھیں چارج شیٹ جاری کی گئی ہے۔
تاہم، سابق ڈی جی نیب شہزاد سلیم نے نیب چارج شیٹ کو اسلام آباد ہائی کورٹ میں چیلنج کر دیا ہے، جس پر اسلام آباد ہائیکورٹ نے نیب کو شہزاد سلیم کے خلاف تادیبی کارروائی کرنے سے روک دیا ہے۔
جسٹس ارباب محمد طاہر نے سابق ڈی جی نیب شہزاد سلیم کی درخواست پر سماعت کی، اسلام آباد ہائیکورٹ نے کہا پٹیشن کے فیصلے تک نیب شہزاد سلیم کے خلاف کوئی تادیبی کارروائی نہ کرے، عدالت نے جواب کے لیے نیب کو 16 دسمبر کے لیے نوٹس بھی جاری کر دیا، اور نیب سے انکوائری کی مکمل رپورٹ اور پیراوائز کمنٹس بھی طلب کر لیے۔
درخواست گزار وکیل نے عدالت کو بتایا کہ نیب اس کیس کی پہلے بھی انکوائری کر چکا ہے، لیکن نیب نے انکوائری ختم کر دی تھی، سپریم کورٹ کے احکامات بھی موجود ہیں، اب دوبارہ انکوائری شروع کر کے جاری کی گئی چارج شیٹ قواعد و ضوابط کے خلاف ہے۔
عدالت نے کیس کی مزید سماعت 16 دسمبر تک ملتوی کر دی۔ یاد رہے کہ پانامہ کیسز کے دوران شہزاد سلیم ڈی جی نیب لاہور تعینات تھے، اس دوران شہباز شریف، مریم نواز، حمزہ شہباز کے خلاف نیب کیسز چل رہے تھے۔
