لاہور: نیب پنجاب نے صوبائی وزیرِ تعلیم رانا مشہود کے خلاف اے آر وائی نیوز پر چلنے والی ویڈیو میں انسانی اسمگلر سے رقم لینے اور پنجاب یوتھ گیمز میں مالی بدعنوانیوں پر شواہد اکھٹے کرنا شروع کردیے۔
صوبائی وزیر تعلیم رانا مشہود کے خلاف مالی بدعنوانیوں اور اے آر وائی نیوز کے پروگرام کھرا سچ میں بدنام انسانی اسمگلر سے رشوت لینے کی ویڈیو فلم پر تحقیقات کا آغاز کر دیا گیا ہے۔
دوسری جانب پنجاب یوتھ گیمز میں مالی بدعنوانیوں کے حوالے سے بھی رانا مشہود کے خلاف نیب کو شکایات موصول ہوئی ہیں، نیب نے دونوں معاملات میں رانا مشہود کے خلاف شواہد اکھٹے کرنا شروع کردیے ہیں۔
آئندہ چند روز میں صوبائی وزیر تعلیم سے باقاعدہ تحقیقات کیے جانے کا امکان ہے۔
دوسری جانب پنجاب حکومت کے ذرائع نے واضح کیا ہے کہ اگر رانا مشہود کے خلاف مالی بدعنوانیوں اور ویڈیواسکینڈل میں تحقیقات شروع ہوتی ہیں تو ان سے استعفی لیے جانے کا بھی امکان ہے، نیب کی جانب سے رانا مشہود کے خلاف شروع کی جانے والی تحقیقات کو سیاسی حلقے پنجاب میں پیپلز پارٹی کے رہنماء قاسم ضیاء اور سابق وزیراعظم یوسف رضاگیلانی اور راجا پرویز اشرف کے بعد ایک بڑی کارروائی قرار دے رہےہیں۔
