اسلام آباد : قومی احتساب بیورو میں اینٹی منی لانڈرنگ سیل قائم کردیا گیا ہے ، سیل دہشت گردوں کومالی معاونت فراہم کرنے پر تحقیقات کرسکے گا، ڈی جی آپریشن ظاہرشاہ سیل کی سربراہی کریں گے۔
تفصیلات کے مطابق قومی احتساب بیورو نے منی لانڈرنگ اور دہشت گردی کی فنانسنگ روکنے کیلئے اہم اقدام اٹھاتے ہوئے اینٹی منی لانڈرنگ سیل قائم کردیا گیا ہے، سیل پانچ افسران پرمشتمل ہوگا۔
نیب اعلامیہ کے مطابق ڈی جی آپریشن ظاہرشاہ سیل کی سربراہی کریں گے، ڈائریکٹرظفراقبال، ایڈیشنل ڈائریکٹرمفتی عبدالحق، جہانزیب فرید،سہیل احمد اور ناصر محمود اینٹی منی لانڈرنگ سیل میں شامل ہوں گے۔
سیل ایف اے ٹی ایف سیکریٹریٹ اورمتعلقہ اسٹیک ہولڈر کے درمیان کوآرڈینیشن بھی کرے گا اور دہشت گردوں کومالی معاونت فراہم کرنے پر تحقیقات کرسکے گا۔
مزید پڑھیں : ایف بی آر کا منی لانڈرنگ اور دہشت گردی کی فنانسنگ روکنے کیلئے اہم اقدام
یاد رہے فیڈرل بورڈ آف ریونیو (ایف بی آر) نے کرنسی اسمگلنگ کے ذریعے دہشت گردی کے لیے مالی معاونت کے خلاف موثر اور بر وقت اقدامات کو یقینی بنانے کے لیے فنانشل ایکشن ٹاسک فورس (ایف اے ٹی ایف) کا سیل قائم کیا تھا۔
یہ سیل ایف اے ٹی ایف کے کام سے متعلق ضروری معلومات ایف بی آر سے حاصل کرے گا، اس سیل کو ڈائریکٹر جنرل آف انٹیلی جنس اینڈ انویسٹی گیشن کے زیر انتظام قائم کیا گیا تھا۔
واضح رہے کہ ایف اے ٹی ایف کی تجاویز میں سب سے اہم سرحد پار کرنسی کی نقل و حرکت کے ڈائریکٹریٹ کا قیام شامل تھا، جو قومی سطح پر رقم اسمگلنگ کرنے والوں کی پروفائل بنانے کے ذمہ دار ہیں۔
