اسلام آباد: چیئرمین نیب جسٹس (ر) جاوید اقبال کا کہنا ہے کہ نیب تفتیشی افسران، پراسیکیوٹرز کی جدید خطوط پر تربیت کو اہمیت دیتا ہے۔
تفصیلات کے مطابق چیئرمین نیب جاوید اقبال نے نیب ہیڈ کوارٹرز میں ٹریننگ، آپریشن اورپراسیکیوشن ڈویژن کارکردگی پر اجلاس سے خطاب کرتے ہوئے کہا کہ نیب انسانی وسائل کی ترقی کو انتہائی اہمیت دیتا ہے۔
انہوں نے کہا کہ نیب تفتیشی افسران، پراسیکیوٹرز کی جدید خطوط پر تربیت کو اہمیت دیتا ہے، نیب افسر، پراسیکیوٹرز کی پیشہ ورانہ بہتری کے لیے تربیتی پلان تشکیل دیا ہے۔
چیئرمین نیب کا کہنا تھا کہ نیب کے علاقائی بیوروزمیں ٹریننگ سینٹرز قائم کیے گئے ہیں، بیوروز متعلقہ علاقوں میں مجوزہ سرگرمیوں پرعملدرآمد کے ذمہ دار ہیں۔
جسٹس (ر) جاوید اقبال کے مطابق ریفریشر، کیپسٹی بلڈنگ کورسز وضع کیے گئے تا کہ معیار یقینی بنایا جا سکے،تفتیشی افسران،پراسیکیوٹرز کے معیار میں بہتری کے لیے تربیت کا اہم کردار ہے۔
چیئرمین نیب نے کہا کہ نیب اعلیٰ ادارہ ہے جسے بدعنوانی کے خاتمے کی ذمہ داری دی گئی ہے، نیب انسانی وسائل کی ترقی کو انتہائی اہمیت دیتا ہے انہوں نے مزید کہا کہ نیب ہیڈ کوارٹرز میں بھی ٹریننگ آف ٹرینرز بھی منعقد کیے جائیں گے۔
