پشاور : قومی احتساب بیورو نے کیپٹن (ر) صفدر کے خلاف اہم شواہد حاصل کرلیے ، جائیدادوں کے جعلی دستاویز پیش کرنے پر نیب نے کیپٹن (ر) صفدر کو دوبارہ طلب کرلیا ہے۔
تفصیلات کے مطابق قومی احتساب بیورو (نیب) خیبر پختونخواہ نے مسلم لیگ کی نائب صدر مریم نواز کے شوہر کیپٹن(ر)صفدر کےخلاف اہم شواہد حاصل کرلیے۔
ذرائع کا کہنا ہے کہ کیپٹن(ر)صفدرنےبے نامی جائیدادیں ، ایک فلورمل تعمیر کی اور دیگرجائیدادیں بنائیں، تحقیقات کے دوران ملزم نے جائیدادوں کے جعلی دستاویز نیب کو پیش کیے۔
ذرائع کے مطابق ان دستاویزات پرکیپٹن(ر)صفدرکونیب نےدوبارہ طلب کرلیا، کیپٹن(ر)صفدرکو16فروری کو نیب میں طلب کیاگیاہے۔
یاد رہے دو روز قبل پشاور ہائی کورٹ نے کیپٹن(ر) صفدر کو آخری مہلت دیتے ہوئے ضمانت قبل ازگرفتاری میں 10مارچ تک توسیع کر دی تھی ،
وکیل نے کہا تھا کہ نیب صرف الزامات لگا رہا ہے،کوئی ثبوت نہیں،کیس بدنیتی پر مبنی ہے، جسٹس اعجاز انور نے وکیل سے مکالمہ کرتے ہوئے کہا کہ لگتا ہے آپ کیس کو طول دے رہے ہیں،آخری موقع دے رہے ہیں،آئندہ سماعت پر فیصلہ کریں گے۔
خیال رہے 2018 میں نیب خیبر پختونخوا نے مسلم لیگ (ن) کے سینئر رہنما کیپٹن (ر) صفدر کے خلاف کرپشن اور خورد برد کی تحقیقات شروع کیں تھیں ، کیپٹن (ر) صفدر پر ترقیاتی اسکیموں میں 2 ارب روپے خورد برد کرنے کے الزامات ہیں۔
