راولپنڈی: قومی احتساب بیورو (نیب) راولپنڈی نے نواز شریف اور ان کے دونوں صاحبزادوں کو طلب کرلیا ہے ان سے عزیزیہ اسٹیل مل کیس سے متعلق پوچھ گچھ کی جائے گی۔
اے آر وائی نیوز کے بیورو چیف لاہور عارف حمید بھٹی نے بتایا کہ نیب راولپنڈی نے 11 اگست کو اس نوٹس پر سائن کیا ہے اور نواز شریف سمیت ان کے دونوں بیٹوں کو 18 اگست کو لاہور آفس میں طلب کرلیا ہے۔
اطلاعات ہیں کہ ان تینوں سے عزیزیہ اسٹیل مل کیس کے حوالے سے پوچھ گچھ کی جائے گی، تینوں کو کہا گیا ہے کہ 18 اگست کو وکیل کے بجائے خود پیش ہوں اور اپنا بیان ریکارڈ کرائیں اور اس کیس سے متعلق دستاویزات بھی پیش کریں۔
اس سلسلے میں نیب کی ٹیم 17 اگست کی رات کو لاہور پہنچے گی اور 18 اگست کو تینوں کا بیان قلم بند کیا جائے گی۔
کیس نیب پنڈی کے پاس مگر حاضری نیب لاہور کے دفتر میں؟ کے سوال سے متعلق ذرائع نے بتایا کہ نیب لاہور دفتر میں طلبی کا فیصلہ چیئرمین نیب کا اپنا ہے۔
یہاں یہ بھی خیال رہے کہ نیب چیئرمین کی تعیناتی نواز شریف نے خود کی تھی جب وہ وزیر اعظم کے عہدے پر تھے۔
اسحاق ڈار کی 23 اگست کو طلبی
ذرائع کا یہ بھی کہنا ہے کہ نیب نے اسحاق ڈار کے معاملے پر ایس ای سی پی کو خط لکھ اہے،اسحاق ڈار کا کیس نیب میں 23 اگست کو دیکھا جائے گا۔
شریف خاندان عزیزیہ اسٹیل مل کی منی ٹریل دینے میں ناکام رہا تھا، فواد چوہدری
اس ضمن میں اے آر وائی نیوز سے بات کرتے ہوئے تحریک انصاف کے ترجمان فواد چوہدری نے کہا کہ شریف خاندان نے گلف اسٹیل بیچ کر عزیزیہ اسٹیل مل لگائی تھی،عزیزیہ اسٹیل کے سرمائے کی منی ٹریل غائب ہے،شریف خاندان عزیزیہ اسٹیل کے ذرائع ثابت کرنے میں ناکام رہا ہے۔
ان کا کہنا تھا کہ عزیزیہ کیس میں نواز شریف،حسن اور حسین گرفتار بھی ہوسکتے ہیں۔
انہیں گرفتار بھی کیا جاسکتا ہے، شیخ رشید
اے آر وائی سے بات کرتے ہوئے عوامی مسلم لیگ کے سربراہ شیخ رشید نے کہا کہ نواز شریف اور ان کے بیٹوں کو نیب کورٹ سے ضمانتیں لینا پڑیں گی ورنہ انہیں گرفتار بھی کیا جاسکتا ہے، میں خود بھی حدیبیہ پیپرز کا بڑا کیس تیار کررہا ہوں۔
